Read Ateso Isabulin 50 Bible Online

Isabulin 50 - Ateso bible

Isabulin 50

¹Esabuli loka Asap. Edeke, ŋes Edeke, EJAKAIT, ener, Anyara akwap anyoun kaneelomunia akoloŋ Aitodol neelomaria bobo.

²Anyoun koSion, ajokis naedolit, Eliyau Edeke.

³Ebunit Ewokodeke, mam Ililiŋi: Enyami akim koiŋareneke, Irimorito ŋes ikwamin lueiliilete.

⁴ Iworoi akuj kokuju, Akwap da, tetere etubokini iketuŋa;

⁵ Kotukonokisi lukalaunakaka neajai; ŋul luetutukete keoŋ aitutuket kasubanit.

⁶Elimonokini akuj akedolit; Naarai Edeke elopet ŋes ekatubon. Sela.

⁷“Kiirasi, okwe ikatwa, kener eoŋ: Ijo Isirael, ketejenuni jo: Arai eoŋ Edeke, Ekonideke.

⁸Mam ketoroni kanuka asubanakon; Ejaas ainakinetakon nuicweio akonyeneka tiritir.

⁹ Mam alemuni emoŋ lotobait kotogokon, Karaida ikorwa lumaseniko kosipaninikon.

¹⁰Naarai iŋolitiaŋ loka amagoro erai lokaŋ, Ka ibaren luejaas koukono ilukumin.

¹¹Ajeni akweny kere nukoronan: Ka itiaŋ da luka ais eraas lukaiŋ.

¹²Arai kaariebi eteŋei, timam kalimok jo: Naarai erai akwap nakaŋ, ka ailelebake.

¹³Anyamenenei kereka eoŋ akirig naka imoŋin lumaseniko? Arai amasenenei kereka eoŋ aokot nuka ikorwa?

¹⁴ Koinanakinenei Edeke asubanit naka aimal: Kitodolenenei akoniiyaposio mama ejai iŋol loejai kuju kakuj:

¹⁵ Ido kiworoununei eoŋ kapaarasia nuka ican; Kayuuni jo, kitopoloori ijo da eoŋ.”

¹⁶Konye ebala Edeke yenikaronon ebe, “Ipodo inyo alimonokin akaicorakineta, Aitwasam da akaitutuket kaitukukon?

¹⁷ Naarai isacit aituutoorio, Ieakanari da akakiro kaukon.

¹⁸ Naianyunia ekokolan, ibu koupakinos kaŋes, Ido kimorikikinos kidotea.

¹⁹Itacamikinit akoniituk einer aronis, Inera da akoninaiep nuka aiŋal.

²⁰Iboie komoromoroi onacekon; Ido isabanakini okoku loka totokon.

²¹ Ibu kiswamaenenei ŋun, keliliŋi eoŋ; Koomite ebe opaputokon cut eoŋ: Konye ketoroni jo, eterereikini kes akonyenekon.

²²Aso do kiitutu nu, yes lukimurwokis Edeke, Kenye apoopo yes, komameun yenikiyuuni;

²³Yeneinakini asubanit naka aimal, ketopoloori eoŋ: ŋin da yenitemokini ekerot Etodikini eoŋ ŋes aitajar naka Edeke.”