Read Ateso Isabulin 51 Bible Online

Isabulin 51 - Ateso bible

Isabulin 51

¹Loka Ekapolokiton lueruos. Esabuli loka Daudi; nakebunio Natan enabi mama ejai, kedau yesi alomari mama ejai Bat-seba. Kitimoi, wu Edeke, kwape ejaar akonisianut-nakamin: Komwata apaanaretaka kwape ejaar aipues naka aitimesiakon.

² Kiloŋarai eoŋ cut numam adoliteka, Kitesegarai da akadiakar.

³ Naarai ajeni eoŋ apaanaretaka: Akadiakar da ejai duc akonyeneka.

⁴ Adiaka eoŋ kaneijai jo bon, Eswama nukaronok kakonyenekon: Tetere kitojokio jo nainerar, Kosegara naitubio.

⁵ Koany, toma numam adolit ŋes kauriere: Toma adiakar da ŋes kapotuunio totoka.

⁶Koany, imiela ijo abeit kotoma atutubeta nukotoma: Kitejenuni ijo eoŋ acoa kotoma atutubet naibwaa.

⁷Kidetarai kesop,[3] alauni eoŋ da: Kiloŋai, kakwanu aitelekarit akile.

⁸Kisiirarai alakara ka aiyalama; Tetere iyalamikinos akojo nuibu kobil.

⁹Kibwa akonyenekon kinyeis aanyun adiakanaretaka, Komwata numam adoliteka kere.

¹⁰ Kosubakinai etau loelai, wu Edeke; Kibwaikinai emoyo lokitetet loetenit tomakaŋ.

¹¹ Sirikiicaka kakonyenekon; Sirikilema ekonimoyo lokalaunan kamakaŋ.

¹² Kinyakakinai alakara naka aitajarakon: Kigaŋai eoŋ kemoyo loka asianut.

¹³Kasodi aisisianakin ikapaanarak ikoniponesio; Ibeleunos do ikadiakanarak mamakon.

¹⁴Wu Edeke, koyuunai kotoma akirot naagwaunit naka aokot, Ijo Edeke loka aitajaraka; Ikalalai akaŋajep ayoore akonidolit.

¹⁵Wu EJAKAIT, kitoona akaituk; Itodiari akaituk akoniiturio.

¹⁶Naarai mam isiyalamikinit asubanit; tikainak: Mam da itojokit ainakinet naicweio.

¹⁷Asubanit naka Edeke ŋes emoyo loebilil: Wu Edeke, mam imeni etau loebilil loisilarit.

¹⁸Kiswamak Sion ejok kakotekon naejok; Koduk ijo arwatatin nuka Yerusalem.

¹⁹ Kosodi ijo aisiyalamikin asuban nuka adolit, Ainakinet naicweio ka ainakinet napeot; Kosodete kesi ainakin imoŋin lutobai kotemukon.