Read Ateso Isabulin 68 Bible Online

Isabulin 68 - Ateso bible

Isabulin 68

¹Loka Ekapolokiton lueruos. Esabuli loka Daudi. Ekosio. Konyou Edeke, kisiarakinos lukasurupoke; Ŋul da luelaito ŋes kokerata kamakeŋ.

²Kwape ireŋearere apuru, kireŋea ijo da kes kwaŋin: Kwape ecalaror edipor kakim, Kooliosi ikaronok kwaŋin kakonyen nuka Edeke.

³Konye kiyalamasi ikadolitok; Kibwoŋasi kakonyen nuka Edeke: Eebo, kolakaros kaiyalama.

⁴Koyeikisi Edeke, koyooto aiturit ekekiror: Kiswamaut erot loka ŋol kaloibwanenit kitorite amodiŋ; YAWE ŋes ekekiror; kibwoŋasi do kakonyeneke.

⁵Edeke kotoma aiboisike nakalaunan, Ŋes papa loka ikokiok, ekeraban da loka apuserun.

⁶ Einakini Edeke obonipe ekal: Elacuni lueenitai kaenis aitekeriana kes: Konye luipaliok iboiete kakwap naeonit.

⁷ Wu Edeke, nakiŋarenikinitor ituŋakon, Naitoritor ijo amodiŋ: Sela.

⁸ Abu akwap komaran, Kodaeun akuj kakonyen nuka Edeke: Komaran emoru je Sinai kakonyen nuka Edeke, Edeke loka Isirael.

⁹Ijo, wu Edeke, ibu kitetep akiru naepol, Kitogogoŋ airumetekon naalolonyitor.

¹⁰ Abu ekodetekon kiboikin nen: Ijo, wu Edeke, ibu kitemonok ajokisikon lukican.

¹¹Elimuni EJAKAIT akirot: Aŋor nuisiarakinete eemut eraas ajore naepol.

¹²Ekerete ikabakan luka ajoresio, ekerete: ŋin da naesali ore ekori luŋatuna.

¹³ Iperete kereka yesi osipanin luka amerekekin, Kwape kabebenoka nuka ajele nuerapara kepuesa, Ka akekopir nuejaas esabu loodos?

¹⁴Nakitisiarikinia Lokapedor kere ikabakan kanen, Kosubite bala akako naetepakini Salumon.

¹⁵Eroŋat Basan ŋes eroŋat loka Edeke; Eroŋat Basan ŋes eroŋat loeoja.

¹⁶Yes iroŋan lukaojak, kanukinyo iteoto kekokote Eroŋat loakoto Edeke aiboikin? Eebo, iboienenei EJAKAIT kanen ikar kere.

¹⁷ Agalin nuka EJAKAIT kes alukumin akaisaarei, Kes alukumin nuka alukumin: Ejai EJAKAIT tomakec, kwape toma Sinai, aibois nakalaunan.

¹⁸ Idoka kuju, ijoreu ijoreunokon, Ijau ijo ainakineta kotuŋa, Eebo, kama kaluipaliok da, tetere iboienenei EJAKAIT Edeke nepepe kakes.

¹⁹Kituritete EJAKAIT: Loibwokenenei ŋinipaaran alagiruwok, ŋes Edeke loerai aitajariowok, Sela.

²⁰ Erai Edeke kamakosi Edeke lokayuununan; EJAKAIT YAWE ŋes elopet aitajar kotoma atwanare.

²¹Konye icumi Edeke akou naka lukasurupoke, Aipelor esiaduk loitatelooritai loka ŋinituŋanan yenedunyakinit agwaunun akiro.

²²Abala EJAKAIT ebe, “Enyakuni kes anyoun koBasan, Enyakuni kes anyoun katar naka aŋolol:

²³Tetere idomakini akonikeju aokot, Tetere edumunete aŋajepa nuka iŋokwokon akorakinetakec kama ejaas lukasurupokon.”

²⁴Aanyut kesi alositokon, wu Edeke, Alosito nuka Ekadeke, Ekakabaka, ilomanari aibois nakalaunan.

²⁵Kiŋarenoto ikayook, kotupakis luetiŋito iboro lueruos, Kokidiŋ apesur nuiyekete isiman.

²⁶“Kituroto Edeke kotoma atukono, Ŋes EJAKAIT, yes luka atan naka Isirael.”

²⁷Ejai Benyamin lodidi ekayaitonikec, Ikapolok luka Yuda ka aurianetekec, Ikapolok luka Sebulun, ka ikapolok luka Naputali.

²⁸Ecoraki Edekekon akonigogoŋ: Kitogogoŋ, wu Elieke, nuibu ijo kiswamak sio.

²⁹ Kanuka eyekalukon loejai Yerusalem Ŋes kiinuniata ikabakan jo ainakineta.

³⁰Kitoron etiaŋ lokotoma osege, Ekodet loka imerukwai ka itak luka ituŋa, Ipudapudai kakeje atutubeta nuka epuesa; Esiarisiar ituŋa luelelakinitos ejie.

³¹ Elomunete ikapolok koMisiri; Isunyakini Etiopia arior akekanin mama ejai Edeke.

³²Koyeikisi Edeke, yes ajakanuto nuka akwapin; Koyooto aiturit EJAKAIT; Sela.

³³Mama kaŋol kaloibwanenit akuj naka akuj, nakejai ageun apeŋo; Koany, inera keporotoke, eporoto lokagogoŋ.

³⁴Koinakisi Edeke agogoŋ, Irumit akejokis Isirael, Akegogoŋ da ejai toma akuj.

³⁵ Wu Edeke, iŋosibib ijo kotoma aiboisiokon nukalaunak: Edeke loka Isirael, ŋes ekori agogoŋ ka apedor mama ejaas ituŋake, Kituritete Edeke!