Read Ateso Isabulin 69 Bible Online

Isabulin 69 - Ateso bible

Isabulin 69

¹Loka Ekapolokiton lueruos; aruo naka Apecelun, Esabuli loka Daudi. Wu Edeke, kitajarai: Naarai alomasi akip kiton otauka.

²Kepok erit loidul, nemam ipedoria abwoia: Adolok atar, nekelikoria akalele.

³Kapas akaimony; aono ekaporoto: Eriokuut akakonye naedaritor Ekadeke.

⁴ Ipu ŋul lukalaito atai edeparito itim luka akouka: Ŋul luekotos aicutar eoŋ, Lukasurupoka kanuka aiŋal, eraas ikagogoŋok: Kasodi kenyakak lumam aŋatarit.

⁵Wu Edeke, ijeni akabaŋaanut; Mam akadiakanareta imunonitai kamakon.

⁶Kinyeis ŋul lukidareunito jo aileicikin kanukaŋ, Wu EJAKAIT Edeke loka ajoresio: Kinyeis ŋul lukimoete jo aitisilio kanukaŋ, Wu Edeke loka Isirael.

⁷Naarai apotu kamoromoroto eoŋ kanukon; Kodakar akakou.

⁸ Araun emoit koinacanaka, Eloŋwait kodwe luka totoka.

⁹ Naarai kaari ekokote loka ekonitogo; Kebirokinos amorosito nuka ŋul kalukimoromoroete jo.

¹⁰Naamonyia, ido kaleco ekatau keteŋei, ŋun kes kamoromoroere.

¹¹ Naanapia epuko, Karau egaraca kama ejaas.

¹² Kinerasi ŋul lueboiete korutei nukaŋ; Arai eoŋ ekosio loka ikamerak.

¹³ Konye kanukaŋ, akailip ejai neijai ijo, wu EJAKAIT, kapak nakacamunio: Wu Edeke, kotoma aitimikon naepol, Koboŋokinoi kotoma abeit naka akoniitajar.

¹⁴Koyuunai kotoma orit, kenyek alumor: Kayuun kama ejaas lukalaito, kataro da.

¹⁵Kinyek akalele arapar eoŋ, Karaida ataro ailikor eoŋ; Kinyek aipany abunakin eoŋ.

¹⁶Koboŋokinoi, wu EJAKAIT; naarai ejok akonisianut-nakamin: Kwape ejaar aipues naka aitimesiakon, koŋolearai.

¹⁷Sirikitoŋopik ekonibulesit akonikonyen; Naarai kaburunit; kisunya aboŋokin eoŋ.

¹⁸Koduduŋ ekatau, koyuu: Kolakunai kama kalukasurupoka.

¹⁹ Ijeni ijo akamorosit, ikaleic, akaitisilio da: Ejaas lukasurupoka kere akonyenekon.

²⁰Ecum amorosit ekatau; kagor noi: Amo luketimete, konye emamei idio da; Ka luketalakarete, konye mam abu kadum.

²¹ Apotu kainakis da epiu araun inyamataka; Nakajakitor akur ketamata yenikadwaran.

²² Korau ekecemesa eic kakonyenekec; Ido naijamamaata korau akuluma.

²³Komudukakata akecekonye, kinyeis aanyun; Kisitelitel aŋabesikec tiritir.

²⁴Kobukok kes akoninyunyura, Kodolok kes adedeŋ naka akonikadakin.

²⁵ Kosilior etogokec; Kinyek da ituŋanan kere ajaut owemanakec.

²⁶ Naarai ereito ŋol loinomo ijo; Emocatar ican kaŋul kaluimusuŋit ijo.

²⁷ Kiyatanak numam adolit mama ejaas numam adolitekec: Kinyeis alomar adolitekon.

²⁸ Komwatarai kes koitabo loka aijar, Kinyeis aiwadikao nepepe kikadolitok.

²⁹Konye ecana eoŋ ido etururue: Kekeu akoniitajara kuju, wu Edeke.

³⁰Eturi eoŋ ekiror loka Edeke kekosio, Etopoloori ŋes kaimal.

³¹Isiyalamikinete ŋul EJAKAIT aitelekarit emoŋ, Arai emoŋ lotobait loeja amumwar ka imageger.

³²Aanyutu luitasonos ŋun, ido eyalamikinos: Yes luimoenenete Edeke, kojarata ikusitauon.

³³Naarai epupununei EJAKAIT luilwaritos, Mam emwaŋit ienanake.

³⁴Akuj ka akwap kituroto ŋes, Aŋololin ka iboro kere luirimete kotoma.

³⁵ Naarai eyuuni EJAKAIT Sion, Eduki da ireria luka Yuda; Kes da iboienenete kanen, kirumito da.

³⁶Aur da naka ikekejaanakinak irumi ŋes, Kes da lueminas ekekiror iboienenete kotoma,