Read Ateso Isabulin 71 Bible Online

Isabulin 71 - Ateso bible

Isabulin 71

¹Wu EJAKAIT, ebwaik akamuno tomakon: Sirikerumata bobo ileic.

²Koyuunai, kitajarai kadolitekon: Kitoik akonikit mamaka, kitajarai.

³ Koraun ijo kamaka atiiba naeboionono, Naalosenenei ducuduc: Icorak ijo aitajar eoŋ; Naarai ijo ŋes akatiiba ido akabwas da.

⁴Koyuunai, wu Ekadeke, kakan naka ikaronon, Kakan da naka yenemamei adolit ka yenemeŋerana.

⁵ Naarai ijo akamuno, wu EJAKAIT Edeke: Ijo amunoka ageun koiditeuka.

⁶ Ageun naajaar akoik naka totoka jo kigagat eoŋ: Ijo ŋol lokitolomuni eoŋ kakoik naka totoka: Keturenenei jo tiritir.

⁷ Arai eoŋ aumokinet kaneeja luipu; Konye irai ijo akaŋopis nakagogoŋ.

⁸Ilelebun akaituk aituriokon, Ka aibusesukon apaaran kere.

⁹Sirikiireŋea kapak nakamojoŋuka; Sirikiijal nakiŋoŋoor akagogoŋ.

¹⁰ Naarai lukasurupoka ineras nukaŋ; Ka ŋul da lueperunete ekatau inerununete nepepe.

¹¹Kobalas ebe, “Ajal Edeke ŋes: Korukioto kikamut ŋes; Naarai emamei yeneyuuni.”

¹² Wu Edeke, sirilwanikina kamakaŋ; Wu Ekadeke, korurukun aiŋarakin eoŋ.

¹³ Kileicikis kodaunos da lueraas lukasurup luka ekarau; Korapiasi kes amorosito ka aitisilio Luemoete aisirieb eoŋ.

¹⁴Konye eoŋ amunonena tiritir; Eyatakini noi aiturit jo.

¹⁵ Elimori akaituk adolitekon, Ka aitajarakon apaaran kere; Naarai mam ajeni etiaikec.

¹⁶ Abuni kaswamisio nuka apedor naka EJAKAIT Edeke: Alimonori nuka adolitekon nupekon bon.

¹⁷Wu Edeke, kisisianak ijo eoŋ ameun keiditeuka; Aitodol kwana da alimo akoniswamisio nukaumokin.

¹⁸Eebo, karaida kamojoŋ koja da akorwo, Wu Edeke, sirikiijal; Aitodol nealimoro akonigogoŋ Mama ejai aturi naetupakini, Akonipedor da mama ejai yenebuni kere.

¹⁹ Akonidolite da, wu Edeke, ikiara noi. Ijo loiswama nuepolok, Wu Edeke, iŋai bo iriakatar jo?

²⁰ Ijo, lokitodik sio ican luipu luetioko; Kitajari sio bobo, Kitodokuni sio kaidules naka akwap.

²¹Kiyatak jo akapolou, Ido kibelokin bobo kitalaka eoŋ.

²² Keturi da jo kibore kayenikutat, Abeitekon da, wu Ekadeke: Ayeikinenei aiturit jo kadeudeu, Wu jo Lokalaunan loka Isirael.

²³ Iyalamikin noi akaituk naayeikinio aiturit jo; Ka ekatau da loibu kolaku.

²⁴Inerenenei da akaŋajep adolitekon Apaaran kere: Naarai eleicikis, adakaros da akecekwes, Luemoete aisirieb eoŋ.