Read Ateso Isabulin 72 Bible Online

Isabulin 72 - Ateso bible

Isabulin 72

¹Esabuli loka Solomon. Wu Edeke, koinak ekabaka itubesiakon, Okoku loka ekabaka da akonidolit.

² Irabanakini ŋesi ikonituŋa kadolit, Ka lukicanikon ketube.

³Einunete iroŋan ituŋa ainapakin, Ka iukono da adolit.

⁴Irabanakini ŋesi lukican kotuŋa, Eyuuni idwe luka luilwaritos, Emunyumunyei da ikamwaŋan.

⁵Eyoŋete jo eriŋa akoloŋ ejai, Eriŋa da elap ecai, anatar aturio kere.

⁶ Ijesuni kwape etepakinia akiru anya nuetubub: Kwape irwairwaikinia elimilim akwap.

⁷ Ekeriakaros ikadolitok kapaarasiake; Ainapakin da naepol aitodol naemamuunor elap.

⁸ Emeari akejakanut kaŋolol kiton aŋolol, Kocor kiton osaŋeta luka akwap.

⁹Luiboiete kamodiŋ ekukonokinos ŋes; Lukasurupoke da idielete apua.

¹⁰ Eyaunete ikabakan luka Tarusis ka luka apujana ainakineta; Ikabakan da luka Syeba ka Seba einakinete akorakineta.

¹¹Eebo, isudedikinos ikabakan kere kakonyeneke: Ijaanakinete ŋes atekerin kere.

¹²Naarai eyuuni yenilwaritoi kemony; Ka yenikican yenemamei ekeŋarakinan.

¹³Itimi yenikican ka yenilwaritoi, Itajari da aijar naka luilwaritos.

¹⁴Elakuni aijarakec kotoma amwaŋio ka adedeŋ: Aokotokec da eraunos nuka etiai loepol kakonyeneke.

¹⁵ Ejarete; einakinio ŋes esabu loka Syeba: Ilipanakinete ŋes ituŋa tiritir; Imalaete ŋes apaaran kere.

¹⁶ Idiliunete akima kakwap kaidiasia nuka iroŋan; Araitoke da kijaŋijaŋa kwape ka Lebanon: Epolooros lukore bala anya nuka akwap.

¹⁷ Ebusi ekekiror ikar kere: Ikopa ekekiror kwape ebusio akoloŋ: Isirereŋio ituŋa kotomakeŋ; Atekerin kere nuka akwap enyaraete ŋes lokarereŋ.

¹⁸Kituritete EJAKAIT Edeke, Edeke loka Isirael, Loesubi bon nukaumokin.

¹⁹Kituritete ekekiror lokaibuses ikar kere; Akwap kere kilelebun akeibuses. Amen, Amen.

²⁰Asaŋata ne ailipasia nuka Daudi okoku loka Yese.