Read Ateso Isabulin 74 Bible Online

Isabulin 74 - Ateso bible

Isabulin 74

¹Masikil loka Asap. Wu Edeke, kanukinyo kicakaria ijo sio ikar kere? Kanukinyo epurionokinia anyunyurakon amerekekin nukoronyikon?

²Kiitu ekodetekon, lokolo ibu ijo kogwel, Loibu ijo kolaku araun ateker nakairumetekon; Ka emoru Sion lokiboieneno ijo.

³Kodakak akonikeje amejei numam edaunos, Nukaronok kere nueswamaki lokasurup aibois nakalaunan.

⁴ Ikunasi lukasurupokon kokidiŋ katukotokon; Ebwaikis imederanakec araun aanyuneta.

⁵Kosubito bala ituŋa luapotu kikeut aepeikec Ajepia amoni naka ikito.

⁶Aswamisio nuigirir kere Ajepa kesi kaepei ka anyulia.

⁷Ecweikis akoniibois nakalaunan; Etisilioto aibois naiboieneno ekonikiror atiyakis kwap.

⁸ Apotu kotemasi kotauonokec ebe, “Katiyatiyata kes cut”: Ecweanakis da atukosia kere nuka Edeke kotoma akwap.

⁹ Mam kianyuni aanyunetawok: Emamei bobo enabi edio da; Kwabo emamei kamawok idio yenejeni ebe itodoli ai.

¹⁰Wu Edeke, itodoli lokasurup ai emoromoroi? Einyanakini kereka da lokasurup ekonikiror ikar kere?

¹¹Kanukinyo inyakaria ijo akonikan, akonikan nakoteten? Kolem ŋes katorobukon komudia kes.

¹² Konye Edeke ŋes Ekabakaka apeŋo, Loiswamai aitajar kokidiŋ kakwap.

¹³ Ibu kotiak aŋolol kanuka akonigogoŋ: Idecideci akwes nuka apiuan kakipi.

¹⁴ Idecideci akwes nuka Lebiatan, [4] Iinak ŋes araun inyamat luka ituŋa luiboienenete kamodiŋ.

¹⁵Ibu kocil atan ka akalele da: Kitoonik icorin luepolok noi.

¹⁶Apaaran erai nakon, akuare da nakon: Ibu kitemok aica ka akoloŋ da.

¹⁷ Ibu kibwaik iikoruno kere luka akwap: Ibu kiswama akamu ka aiporo da.

¹⁸ Kiitu na, wu EJAKAIT, ebe amoromor lokasurup, Ituŋa da lubaŋiok ainyanakis ekonikiror.

¹⁹ Sirikiinak aijar naka ajelekon mama ejai etiaŋ loka ais: Sirikiimurwok aijar naka lukieanakon ikar kere.

²⁰ Koricite aitutuket: Naarai aiboisio nuemutoko nuka akwap ileleba itogoi luka akaje.

²¹ Okwe kinyeis luereitai aboŋun ileicikinito: Kituroto lukican ka luilwaritos ekonikiror.

²² Konyou, wu Edeke: kopurokin bon, Kiitu kwape kimoromoroo jo ituŋanan yenibaŋ apaaran kere.

²³Sirikiimurwok eporoto loka lukasurupokon: Edokununei tiritir ecelet loka ŋul kalukisurokinito jo.