Read Ateso Isabulin 78 Bible Online

Isabulin 78 - Ateso bible

Isabulin 78

¹Masikil loka Asap. Wu ikatuŋa, kopupokisi ekakisil: Kitoikisi akusiki akiro nuka aitukuka.

² Awoŋaari akaituk kotoma awarag; Eneri akiro nuimunonoro nukoloŋo.

³ Nukipupu ka nukijenu, Nukilimonokis oni lukapapaawok.

⁴ Mam kimunoni kes kama ejaas idwekec, Alimonokin aturi naebunit aiturio naka EJAKAIT, Ka akegogoŋ ka akeswamisio da nukaumokin nueswama.

⁵Abu kiticat aitejenunet kotoma Yakob, Kibwaik ekisil toma Isirael, Loabu kicorak lukapapaawok, ebe, Ibusakinit aitejenun kes idwekec.

⁶ Tetere aturi naebunit ejenuni kes, Ka idwe da lueponio aur; Luepote anyoun alimokin kes ikecedwe.

⁷Tetere ibwaikinete amunokec toma Edeke, Komam imurwokinete aswamisio nuka Edeke, Konye koricito akeicorakineta.

⁸Ido kinyeis aiput lukapapaakec, Aturi naaninik naepaliono; Aturi namam abu kitemok eketau, Namam ekemoyo eketakina mama ejai Edeke.

⁹Akapakina idwe luka Epuraim kalujiis, kitiŋito akabwai, Koboŋosi kau kotoma apaaran naka, ejie.

¹⁰Mam aricito aitutuket naka Edeke, Koŋero alosenen kokisilake;

¹¹ Kimurwokis akeswamisio, Ka nukaumokin nuabu kitodik kes.

¹² Abu kiswama nukaumokin kakonyen nuka lukapapaakec, Kotoma akwap nako Misiri, omanikor da loka Soan.

¹³ Abu kotiak aŋolol, kitotor kes toma; Kitobwo akipi kwape kabwas.

¹⁴ Paaran kiŋarenikinite kes kedou, Akuare da kere kaica naka akim.

¹⁵ Abu kocil atiiba kotoma amodiŋ, Kitamat kes akipi nuepu bala nuelomunete kataro.

¹⁶ Kitolom icileta kotoma atiiba, Kitelelea da akipi kwape kicorin.

¹⁷ Konye kodiakanarete kesi kwape kwaŋin kamakeŋ, Aipaliikin Loejai kuju kakuj kotoma amodiŋ.

¹⁸ Apotu kokodut Edeke kotauonokec Kanuka eibelikec kiisito inyamat.

¹⁹ Eebo, apotu koluikinito Edeke koinerekec; Kobalas ebe, “Epedori kereka Edeke aitemokin emesa kotoma amodiŋ?

²⁰ Koany, abu ŋesi kinom atiiba, kibulubulunos akip, Koleleata icileta; Epedori kereka ŋesi ainakin atap da? Itudumikini kereka ŋesi iketuŋa akiriŋ?”

²¹Kanuka ŋun kepupu EJAKAIT, konyunyurikin: Kinepak akim Yakob, Konyoik da anyunyura Isirael.

²² Naarai mam eyuunito Edeke, Komam da emunos akeitajar.

²³ Konye abu kicorak akuj, Koŋaa da ikekia luka akuj;

²⁴ Kitetepik kes emanu ainyam, Koinak da kes akima nukokuju.

²⁵Apotu ituŋa konyamata atap naka lukapedor: Kijukak kes inyamat luaupete cut.

²⁶Kitukut ekwam loka ari nakokide kotoma akui: Abu kiŋarenik ekwam loka ari naka eŋalakimak kotoma apedorike.

²⁷Kitetepik kes akiriŋ kwape kapua, Ka alurueik da kwape kasinei naka aŋololin.

²⁸Kitodoik kidiŋ oidukurunukec, Alukun akeceiboisio.

²⁹Kwaŋin apotu konyamata, kimonikinos cut; Koinak luekibelikinito kes.

³⁰Mam ekeceibel abu kiŋoŋoor, Koriŋa akecekiriŋ ejai aitukekec.

³¹Konyoiki kes anyunyura naka Edeke, Koar luetelekaritos atumit kakesi, Kodany ikatumunak luka Isirael.

³²Keja ŋun kere da, kodiakanarete ca kwape kwaŋin, Komam iyuunito aswamisioke nukaumokin.

³³Kanuka ŋun, abu ŋesi koŋetak akecepaarasia kotoma nukamameak, Ka ikecekaru da kotoma akurian naepol.

³⁴ Naaaria kes, ŋes konyet ewoneoto ŋes: Koboŋut kodunyakis amoote Edeke.

³⁵Kiitut da ebe Edeke ŋes atiibakec, Edeke Loejai kuju kakuj ŋes ekalakunanikec.

³⁶ Konye komodakito aiturite ŋes kakeceituk, Kiŋalaŋalata da ŋes kakeceŋajepa.

³⁷ Naarai mam ekecetau atenit kamakeŋ, Ido mam keraas imunon kotoma aitutuketeke.

³⁸ Konye ŋes, kanuepoloor aitim, abu kisioni numam adolitekec, Mam abu komudia kes: Eeca, irwan ipu abu ŋesi kisinac akededeŋ, Ido mam abu kidikok akenyunyura kere.

³⁹ Kiitu ŋesi ebe keraas kesi awat; Ekwam loetubor, komam eboŋuni bobo.

⁴⁰Ipu ca ma aatenak nuapotu kipaliikinioto ŋes kotoma ais: Kitakadikiniata ŋes kotoma amodiŋ!

⁴¹Kibelokinos da bobo kokodut Edeke, Kitunyunyurikis Lokalaunan loka Isirael.

⁴²Mam apotu kiitut akekan, Karaida apaaran naalakunia kes kama kalukekolo.

⁴³Kwape kibwaikinia akeanyuneta toma Misiri, Ka nukaumokinike da omanikor loka Soan;

⁴⁴ Kitarau ikececorin aokot, Ka ikececileta da tetere mam epedorete aimat.

⁴⁵ Kijukak kes atukon nuka icuc, luapotu konyamata kes: Ka aidodoka da nuapotu komudiasi kes.

⁴⁶ Kitanyam ekutelek akecemio, Ka lukorionokec da kitanyam emaase.

⁴⁷ Komudia ikecemusabibun kakako, Ka isukumorinikec da komudia kakako naepol noi.

⁴⁸Ikecebaren da kotula kakako, Ka ikecesipanin luka amerekekin kotula kamwanis naka eipyei.

⁴⁹ Kocakak mamakec adedeŋ naka aitakadikinioke, Anyunyura, ka aisiop, ka ican da, Ekodet loka imalaikan lukaronok.

⁵⁰Abu kocilak akenyunyura esokot, Mam abu kideu aijarakec kaneejai atwanare, Konye kotulana.

⁵¹ Kodany ikiyaik kere kotoma Misiri, Ageunet naka agogoŋukec koweman luka Kam.

⁵² Konye komea iketuŋa kwape kamerekekin, Kiŋarenik kes kotoma amodiŋ kwape kesipan loka amerekekin

⁵³ Komea kes kainapakina, ŋes mam akuriakatar: Konye abu aŋolol korapia lukasurupokec.

⁵⁴ Koyau kes akwapuke nakalaunan, Kiton oroŋat lo, loagwelit akanike nakoteten.

⁵⁵ Kireŋea atekerin nuaja kiŋarenekec, Kokoranak kes airumetekec, Kisiboik da idwe luka Isirael owemanakec.

⁵⁶ Konye kokodut bobo kipaliikis Edeke Loejai kuju kakuj, Mam da aricito aitejenunetake.

⁵⁷ Kibelooros kau kiswamata nukamodomod kwape kalukapapaakec: Kopaasi awai bala akabwa nakeŋalan.

⁵⁸ Naarai apotu kitunyunyurikis ŋes kaiboisiokec nuiceleleete, Kitokokoloto da ŋes kaputosiakec nuikec.

⁵⁹ Kepupu Edeke ŋun, konyunyurikin, Kosac cut Isirael.

⁶⁰ Kwaŋin abu kojal ewema lokalaunan loka Silo, Ewema loeboieneno ŋesi kokidiŋ otuŋa.

⁶¹ Koinak akegogoŋ toma aŋatario, Akeibuses da toma akan naka lukasurup.

⁶²Koinak iketuŋa da neejai ekileŋ; Konyunyurikinite airumeteke.

⁶³Konyam akim ikatumunakakec; Apesurukec da amamei ekosio loenyamanarere adukokin.

⁶⁴ Kodany ekileŋ isasedotinikec; Apuserunukec da mam akuudianete.

⁶⁵ Kosodi EJAKAIT akwenyun bala yenekwenyuni kajo, Kwape etuŋanan lokagogoŋon loecela kanuemerar ajon.

⁶⁶Koreto lukasurupoke kau: Kisurum kes ileic lumam edaunos.

⁶⁷Bobo da abu kogir ewema loka Yosep, Mam abu koseu ateker naka Epuraim.

⁶⁸Konye koseu ateker naka Yuda, Emoru Sion loamina.

⁶⁹ Koduk aiboisike nakalaunan kwape kimor, Kwape kakwap naeticat ŋesi ikar kere.

⁷⁰ Koseu Daudi da ebulesitike, Kolem ŋes kanuk naka amerekekin.

⁷¹ Kolem ŋes kacok amerekekin nuetanakete, Aitanyam Yakob iketuŋa, ka Isirael airumeteke.

⁷² Kwaŋin kitanyam kes kwape kejaar aliogot naka etauke; Kiŋarenik da kes kapirianut naka akaninike.