Read Ateso Isabulin 81 Bible Online

Isabulin 81 - Ateso bible

Isabulin 81

¹Loka Ekapolokiton lueruos; aruo naka Gitit. Esabuli loka Asap. Koboorianata ayoere mama ejai Edeke agogoŋuwok: Kikareoto kaiyalama mama ejai Edeke loka Yakob.

²Koyooto esabuli kituruoto da isiman, Ka adeudeu naejijim ka yenikutat.

³ Kokutakis arupepe kilamu elap: Kepoloor da cut elap, kapaaran naka epucitiwok loiyamakina.

⁴ Naarai erai ekisil kotoma Isirael, Aicorakinet naka Edeke loka Yakob.

⁵Abu koseu ŋes kotoma Yosep araun aitejenunet, Naalosio aluikin akwap nako Misiri: Nama apupunio aŋajep namam ajeni.

⁶“Abu kalema alaŋiru kokeperike: Ka akekanin da kojalas kodita.

⁷ Ibu konyara kotoma ocan, abu kayu; Kaboŋok jo kotoma aibois nakaiyeiyea naka airetun; Abu ketem jo kakipi nuka Meriba. Sela.

⁸Kopuputu, wu ikatuŋa, eoŋ da ketejenuni yes: Wu Isirael, tikipupok eoŋ!

⁹ Sirikejaun edeke ece loegelara tomakon; Karaida jo aima ecedeke loegelara.

¹⁰ Arai eoŋ EJAKAIT Ekonideke, Loabu kitolom jo kakwap nako Misiri: Kooŋa noi akoniituk, kelelebik.

¹¹Konye ikatuŋa mam apotu kopupokis ekaporoto; Ido Isirael mam kakoto eoŋ.

¹² Kwaŋin abu kajalak kes atupar aninik naka itauonokec, Tetere elosenenete kotoma ainerununikec nuka ikulepek.

¹³ Konye karai ikatuŋa kapupokis eoŋ: Kosodi Isirael alosenen korotinika!

¹⁴Tieon ketonokok lukasurupokec atipet, Kasodi aibelokin akakan asurokin luitokokolito kes.

¹⁵Luelaito EJAKAIT tiiyapaara kamakeŋ: Konye timam akecepak kedaun.

¹⁶Tiketanyam yes akima nuejok noi adepar: Tikesimonik kesik lokomoru.”