Read Ateso Isabulin 86 Bible Online

Isabulin 86 - Ateso bible

Isabulin 86

¹Ailip naka Daudi. Kitoik akonikit, wu EJAKAIT, koboŋokinoi; Naarai ecana eoŋ ido elwaritoi.

²Kidar akaijar; naarai ayoŋit eoŋ Edeke: Wu jo Ekadeke, kitajar ekonibulesit lokimuno jo.

³Kitimoi, wu EJAKAIT; Naarai amonyi mamakon aitiwar akwap.

⁴Kisiyalamik aijar naka ekonibulesit; Naarai ekeunit ekatau mama ijai, wu EJAKAIT.

⁵ Naarai ijok ijo, EJAKAIT, itemokino aisioni, Epol aitimikon mama kaŋul kere lukiwoneete jo.

⁶Wu EJAKAIT, kitoik akit akailip; Kopupok eporoto loka akaiŋaiŋa.

⁷Kapaaran naka icanika ewonei jo; Naarai kiboŋokini eoŋ.

⁸ Wu EJAKAIT, emamei loiputotor jo kodekesio; Emameete da nueputotor akoniswamisio.

⁹ Wu EJAKAIT, epote atekerin kere nuibu kosub aima jo; Itopoloorete da ekonikiror.

¹⁰ Naarai ipol ijo, iswamai da nukaumokin; Ijo bon Edeke.

¹¹Wu EJAKAIT, kisisianakinai ekonirot, Alosenenei kotoma abeitekon: Kimorikik ekatau ayoŋit ekonikiror bon.

¹²Wu EJAKAIT Ekadeke, keturi jo kekatau kere; Etopoloori ekonikiror ikar kere.

¹³ Naarai epol akoniitim mama ajai: Ibu koyu akaijar kaipany naejai kwap noi.

¹⁴Wu Edeke, kanyoikis luiwoŋooko, Emoi da atukot naka lukakaje akaijar, Komam kibwaikinito jo akonyenekec.

¹⁵ Konye jo, wu EJAKAIT, irai Edeke loileleba aision, isiana da, Iyapi anyunyurikin, epol akoniitim ka abeit.

¹⁶Okwe, kibelokin mama ajai, kitimoi; Koinak ekonibulesit akonigogoŋ, Kitajar ikoku yenika akonibulesit.

¹⁷Kitodikinai aanyunet naka ajokis; Tetere lukalaito eanyunete, kirumata ileic, Naarai ijo, EJAKAIT, ibu kiŋarak eoŋ, kitalaka da.