Read Ateso Isabulin 88 Bible Online

Isabulin 88 - Ateso bible

Isabulin 88

¹Ekosio, Esabuli loka odwe luka Kora; loka Ekapolokiton lueruos; aruo naka Makalat Leanot, Masikilloka Keman Eserakit. Wu EJAKAIT, Edeke loka akaitajario, Amonyi paaran ka kuare da kakonyenekon:

²Kocamak akailip kolom neijai ijo; Kitoik akonikit mama ejai aimonyoka.

³Naarai ileleba emoyoka ican, Akaijar da aapia Okatwak.

⁴Kemarakinitai eoŋ nepepe kaŋul kaluijesaros toma Aipany; Arai eoŋ kwape ketuŋanan yenemamei aiŋarakinio.

⁵Kacakakin neeja ikatwak, Kwape luaaritai lueperete kates, Lumam ijo iitunit bobo cut; Agelaros kakanikon.

⁶Kiperik ijo eoŋ toma Aipany nakokwap noi, Toma aiboisio nuemutoko, toma ataro.

⁷Kalaŋirikinit noi akoninyunyura, Kiŋaru ijo eoŋ kakonikailan kere. Sela.

⁸Isieka ijo ikapapero kamakaŋ, Kitarau da eoŋ ibore yeneketal kamakec; Kagoloritai, mam apedori alomun kiŋa.

⁹Aororor akakoŋu kanuka aiticanioka; Wu EJAKAIT, ewonenenei mamakon ŋinipaaran, Egagat akakanin mamakon.

¹⁰Itodikini kereka ijo lukatwak nukaumokin? Enyounete kereka itoilon aiturit jo? Sela

¹¹Elimor kereka akonisianut-nakamin kotoma ates? Arai bo akonimunonut kotoma Amudiario?

¹² Ejenunos kereka nukaumokinikon kotoma amuton? Adolitekon da kotoma akwap naka aimurwonut?

¹³Konye wu EJAKAIT, mamakon amony eoŋ, Ido tupuruc elipenenaa kakonyenekon.

¹⁴EJAKAIT, kanukinyo icakaria ijo ekamoyo? Kanukinyo da ibwaia ijo akonikonyen kamakaŋ?

¹⁵ Keticanio kaapianari atwanare ameun koiditeuka: Nakesiriebiata nuketasurokon eyaloŋoŋi.

¹⁶Karapa eoŋ anyunyurakon naededeŋ: Kagelasi eoŋ nuketasurokon.

¹⁷Apotu kesi kerimosi eoŋ bala akipi apaaran kere; Apotu da kalukut eoŋ.

¹⁸ Isieka ijo kama kayeniminat ka ipapero; Ipaupaka da amuton.