Read Ateso Isabulin 90 Bible Online

Isabulin 90 - Ateso bible

Isabulin 90

¹Ailip naka Musa, etuŋanan loka Edeke. EJAKAIT, irai ijo akosiibois nakiboienenoo, Anatar aturio kere.

² Eriŋa iroŋan kesubuna, Eriŋa jo kesubuna alup ka akwap, Ameun ikar luŋo kiton ikar kere, ijo ŋes Edeke.

³ Inyakari ituŋanan toma apua; Kobala ebe, “Koboŋosi, yes idwe luka ituŋa!”

⁴ Naarai kakonyenekon ikar elukumit Esubito bala nakabian naatubor, Ido bala akwenyunet naka akuare.

⁵ Iyaŋaari kes kwape kakalele; esubito bala ajo: Tupuruc esubito bala inya luebwanuŋete.

⁶ Elibunete tupuruc epoloete da, Etubio eboŋ, erinyorete.

⁷Naarai kimudia sio akoninyunyura, Kisiyaloŋoŋoi sio akoniisiop.

⁸ Ibwaik numam adolitekosi akonyenekon, Adiakanaretakosi nukaiyeiyea da aica naka akonyenekon.

⁹Naarai atuboros akosipaarasia kere kotoma anyunyurakon: Kitanaŋi ikosikar bala aomisioit.

¹⁰Apaarasia nuka ikarukosi kes ikar akaisakanykaarei, Arai kija kagogoŋ imwaunete ikar akaisakanykauni; Konye ekeceitur erai aitaaritoi ka aiturur bon; Naarai eoliori atipet, kimameun da.

¹¹Iŋai bo ejeni apedor naka akoninyunyura, Ka akoniisiop kwape kibusakinitor ayoŋit jo?

¹² Kisisianakinai do Sio aimar akosipaarasia, Tetere kidumuni etau loka acoa.

¹³ Koboŋ, wu EJAKAIT! Itodoli bo ai? Kiitu ikonibulesin.

¹⁴Kisimonikinai sio tupuruc kakoniitim; Kasodete ailel ka aiyalamikin akosipaarasia kere.

¹⁵Kisiyalamikinai sio kwape ejaatar apaarasia nuibu kiticania, Ka ikar da lukianyunitor aronis.

¹⁶ Kotakanik ikonibulesin akoniswam, Ka akoniibuses da odwekec.

¹⁷ Kojaikin ajokis naka EJAKAIT Ekosideke mamakosi: Kiticat ijo aswam naka akaninikosi kamakosi, Eebo, kiticat aswam naka akosikanin.