Read Ateso Awaragasia 11 Bible Online

Awaragasia 11 - Ateso bible

Awaragasia 11

¹Aitemis nakaiŋal ŋes naketal mama ejai EJAKAIT: Konye isiyalamikinit ŋes emisani loedolit.

² Naebunio aiwoŋonut ŋes eponiata ileic: Konye ejai acoa kaluitasonos.

³Abeit naka luitenara kotauon ŋes iŋarenikini kes: Konye amagul naka luebilete ebotet ŋes emudiari kes.

⁴ Mam abar isikeriani kapaaran naka anyunyura: Konye eyuuni adolit katwanare.

⁵Iteteni adolit naka loliogot otau ekerot: Konye ibirori ekaronon kanuka akeronis.

⁶ Adolit naka luitenara kotauon ŋes eyuuni kes: Konye ipoki ameŋeranutukec ŋul luebilete ebotet.

⁷Naetwania ekaronon, eoliori akemun: Eoliori da amun naka numam adolit.

⁸Eyuunio ekadoliton kotoma ocan, Kobuni do ekaronon aiboisike.

⁹ Emudiari etuŋanan lomam eyoŋit Edeke ekeidunyet kaitukuke: Konye eyuunio ekadoliton kanuka aijen.

¹⁰ Nakeanyuniata ikadolitok ajokis, elakara ere: Nakeolioroto ikaronok ejai eibwoŋ.

¹¹Itopoloorio ere kanuka aisirereŋio naka luitenara kotauon: Konye etiyaikinete aituke nuka ikaronok.

¹²Ŋol loemwaŋi ekeidunyet emamei acoa, Konye ililiŋi etuŋanan lokajenun.

¹³Otibeele loideidei epukori nukaiyeiyea: Konye ŋol lokemoyo lomunot imunoni akirot.

¹⁴ Neemamei aitetenio ibiroros ituŋa: Konye kaipues naka ikenerunak ejai ainapakin.

¹⁵Ŋol loerauni ekabwoaran loka emoit eanyuni ican: Konye inapakina ŋol loelait abwoanar.

¹⁶Aberu nakasianut edumuni aibuses: Ikiliok lukakaje edumunete abar.

¹⁷ Etuŋanan loitimi iswamakini aijarake ejok: Konye ŋol loededeŋ iticani akuanake.

¹⁸ Edumuni ekaronon eropit lokaiŋal: Konye ŋol loeyei adolit edumuni eropit lokabeit.

¹⁹Ŋol loiketakina kadolit edumuni aijar: ŋol da loetupari aronis earakini bon.

²⁰Ŋul luejaas itauon lumagul eraas luketale mama ejai EJAKAIT: Konye ŋul luedoliorito korotokec isiyalamikinete ŋes.

²¹Abeit etuŋanan lokaronon mam eswaki aiticanio, Konye eyuunio aur naka ekadoliton.

²²Kwape etet loka esabu kokume loka epege, Ikoni nen aberu naitemelel naemamei acobeu.

²³ Ejok luimiela ekadoliton: Konye amuno naka ikaronok ŋes anyunyura.

²⁴Ejai loisiarisiari, ido iyatanakini adumun; Ejai da loimiki aitelekarit luibusakinito, konye etwaniari.

²⁵ Iturumio ojokotau: Ŋol da loicocoi akipi icocoikinio.

²⁶ Ikenete ituŋa ŋol loimiki kes akima: Konye ejai arereŋ akou naka ŋol kaloegwelari.

²⁷ Ŋol loinyikokin amoot adolit, emoot asianut: Konye ŋol loemoot ameŋeranut, edolokini ŋes.

²⁸ Ibiror ŋol loemunokina akebar: Konye ekerianar loedolit kwape kakuii nuelibete.

²⁹ Ŋol loiticani ekaleke irumi ekwam: Eraun ebaŋ ebulesit loka lokacoa kotau.

³⁰Araito naka ekadoliton ŋes ekitoi loka aijar; Ka ŋol da loejai acoa edumuni aijar naka ituŋa.

³¹ Koany, einakinio ekadoliton eropit kakwap: Itelekarito cama ekaronon ka ekadiakanaran!