Read Ateso Awaragasia 13 Bible Online

Awaragasia 13 - Ateso bible

Awaragasia 13

¹ Epupi ikoku yenikacoa aicorio naka papake: Konye yenemwaŋana mam epupuni aitoronio.

²Enyami etuŋanan nuejok kanuka araito nuka aitukuke: Konye etau loka kaluebilete ebotet enyamenenei epali.

³ Yenidari akeŋajep itogogoŋi aijarake: Konye loitooŋari noi akeituk edumuni amudiario.

⁴Iŋobelei etau loka kaloeloŋwana, komam edumuni ibore: Konye imonikin etau loka kaloekukurana.

⁵ Elait etuŋanan loedolit aiŋal: Konye etuŋanan lokaronon esiliana, ido irumete ileic.

⁶ Igalikini adolit loetenit korot: Konye isibirori aronis ekadiakanaran.

⁷Ejai loitabarikin, kwabo komamei ibore: Ejai loicanakin, kwabo kojaas kabar naepol.

⁸Elakuni abarake aijar naka etuŋanan: Konye mam lokican epupuni aitukurianio kere.

⁹Iyalama aica naka luedolito: Konye itudeŋio atala naka ikaronok.

¹⁰Eyauni aiwoŋonut epeget bon: Konye ejaun acoa kaŋul kaluinerunete ejok.

¹¹ Iŋoŋario abar naedumunio kanuka aamameak: Konye iyatakinio loetukonokini kakukuranut.

¹²Amuno naiyapi itudusaununei etau: Konye naebunio yeniŋobeleo eraun ekitoi loka aijar.

¹³ Eyauni ŋol loemenit akirot amudiario: Konye einakinio loeyoŋit aicorakinet eropit.

¹⁴ Erai ekisil loka lokacoa atan naka aijar, Anyoun koica luka atwanare.

¹⁵Eyauni ajenun ejok aminunio: Konye ikurajaj erot loka kaluebilete ebotet.

¹⁶ Iswamaenenei ŋolituŋanan lopirioit kaijen: Konye ebaŋ isiarakini abaŋaanut.

¹⁷Ibirokin ekijukitono lokaronon aronis: Konye erai ekiyakia lomunot aŋaleu.

¹⁸ Ejaunete ican ka ileic ŋol loeŋeri aicorio: Konye itubusikinio loibwaikinit etau toma aitoronio.

¹⁹Ejijimikini etau aiŋobel naetodolikin: Konye anyoun karonis erai naketal kama ejaas ibaŋiok.

²⁰Koupenenas kalukacoa, icouni ijo da: Konye eswalar aupakec loka ibaŋiok.

²¹ Ekerikinit aronis ikadiakanarak: Konye etacakinio ikadolitok ajokis.

²² Inyeinia etuŋanan loejok idwe luka idweke airumet; Iŋadakinio ikadolitok abar naka ikadiakanarak.

²³ Ejaas inyamat luipu toma mana naka lokican: Konye ejai loemudiario kanuka aitub namam abeit.

²⁴ Loitikokini aparisike, elai okokuke: Konye loemina okokuke ekukurikina aiteten ŋes.

²⁵Enyami ekadoliton kimonikin eketau: Konye ijoganitoi akoik naka ekadiakanaran.