Read Ateso Awaragasia 15 Bible Online

Awaragasia 15 - Ateso bible

Awaragasia 15

¹Aboŋokinet naiyapaara irebori anyunyura: Konye akiro nuededeŋ isidikete anyunyura.

²Aŋajep naka lokacoa ekori aijen naibecokino: Konye ebukuni aituk naka ebaŋ nukabaŋaanut.

³ Ejaas akonye nuka EJAKAIT ŋiniibois, Irereete aronis ka ajokis.

⁴Aŋajep naiperioro ŋes ekitoi loka aijar: Konye akiro numagul ebilete emoyo.

⁵Emeni lobaŋ aicor naka papake: Konye loibwaikini etau aitoronio edumuni acobeu.

⁶Ejai abara naepol togo loka ekadoliton: Konye luedumuni lokaronon eraas ican bon.

⁷Isilosikinete aituke nuka luecobe aijen: Konye mam ikote nen kotauon luka ibaŋiok.

⁸ Asuban nuka ekaronon eraas nuketale kaneejai EJAKAIT: Konye isiyalamikini ailip naka luitenara itauon.

⁹ Erot loka ekaronon erai loketale kaneejai EJAKAIT: Konye emina ŋesi loetupari adolit.

¹⁰Ejai aisisianakinio naetiono neejai ŋol loinyeini erot: Ŋol da loelai aitoronio etwani.

¹¹ Ideleleete Okatwak ka Amudiario kakonyen nuka EJAKAIT: Aso ideleleete do noi itauon luka idwe luka ituŋa!

¹²Mam ekamwaŋan emina aitoronio: Mam da ekoto alosit neejaas lukacoa.

¹³Etau loiyalama italakari akonyen: Konye ican lukotau kes ebilete emoyo.

¹⁴Etau loka ŋol kaloejai ajenun emoot aijen: Konye aituke nuka ibaŋiok enyamete abaŋaanut.

¹⁵Eroko apaarasia kere nuka luiticanio: Konye ŋol loejai etau loelakara enyami epucit lomam edaun.

¹⁶ Ajaut kaluikidioko ka ayoŋit EJAKAIT, Itelekarit abar naepol naejaas ican.

¹⁷Ejok ainyam edia lokigalala kominanara, Itia ainyam atarion naka emoŋ koŋuŋanara.

¹⁸Etuŋanan lokanyunyura isidiki aŋolopa: Konye ŋol loiyapi anyunyura isinapikini epeget.

¹⁹Erot loka loekalanyana esubit bala abwas naka ikukwa: Konye esokot loka luitenara itauon eraun erot loelal.

²⁰Okoku lokacoa isiyalamikinit papake: Konye lobaŋ emeni totoke.

²¹ Abaŋaanut ŋes aiyalama neejai ŋol loemamei acoa: Konye iteteni etuŋanan loejai aijen alositeke.

²²Neemamei ainerun etwakiarete nuelosikinitoi: Konye icatunete kaipues naka ikenerunak.

²³Isiyalamikinit etuŋanan aboŋokinet naka aitukuke: Ejok ca ma akirot nainerai kapakike naebeit!

²⁴ Edokari erot loka lokacoa kuju neejai aijar, Tetere enyouni kokwap kaneejai Okatwak.

²⁵Erutori EJAKAIT etogo loka loiwoŋoono, Konye iticasi eikor loka apuserut.

²⁶Aomisio nuka ikaronok eraas nuketale kaneejai EJAKAIT: Konye ejokuka akiro nuisiyalamikinito.

²⁷ Loiraŋai ameda iticani eketogo: Konye ejari ŋol loesaci ainakineta.

²⁸ Eomoomoi etau loka ekadoliton nueboŋokini: Konye ebukuni aituk naka ekaronon nukelepa.

²⁹ Elwana EJAKAIT kaneejaas ikaronok: Konye iirari ailip naka ekadoliton.

³⁰Isiyalamikinit aica naka akonye etau: Itutumete akiro nuejok akojo.

³¹Akit naepupuni aitoron naka aijar Iboienenei kalukacoa,

³²ŋol loeŋeri aicorio emeni eketau: Konye ŋol loepupuni aitoronio edumuni aijen.

³³Ayoŋit EJAKAIT ŋes aituutoorio nakacoa; Ido aitasonikin iŋarenikini aibuses.