Read Ateso Awaragasia 16 Bible Online

Awaragasia 16 - Ateso bible

Awaragasia 16

¹ Nuelosikinit etau eraas nuka etuŋanan, Konye ebuni aboŋokinet naka aŋajep kaneejai EJAKAIT.

² Elaete irotin kere luka etuŋanan kakonyeke: Konye itemi EJAKAIT imoyon.

³Kititiŋik EJAKAIT aswamisiokon, Akoniwomisio da iticasio.

⁴ Esubakinit EJAKAIT ŋinibore aswamuke: Eebo, lukaronok da esubakinit apaaran naka aronis.

⁵Ŋolituŋanan loiturokina kotauke erai loketale kaneejai EJAKAIT: Abeit, mam eswaki aiticanio.

⁶ Aitim ka abeit kes elucete numam adolit: Ido ayoŋit EJAKAIT isinaci ituŋa aronis.

⁷ Arai isiyalamikinete irotin luka etuŋanan. EJAKAIT, Isinapikini lukasurupoke da.

⁸Ejok ajaut kaluikidioko ka adolit, Itia ajaut kameda naepol ka amamus etube lokabeit.

⁹ Ineruni etau loka etuŋanan irotinike: Konye EJAKAIT iteteni akejeke.

¹⁰Adwaranut ejai aituk naka ekabaka: Mam ediakari aŋajepeke kotoma otube.

¹¹ Aitemis ka imisanin luedolito eraas nuka EJAKAIT: Luitemete kere lukoriagi eraas aswamuke.

¹²Aswam aronis erai naketal kaneejaas ikabakan, Naarai adolit iticasi eicoloŋ loka ajakanut.

¹³Isiyalamikinete ikabakan aituke nuedolito: Eminasi kesi ŋol loinera nuitenara.

¹⁴Esubit anyunyura naka ekabaka bala ikiyakia luka atwanare: Konye lokacoa isinapikini ŋes.

¹⁵Ejai aijar toma aica naka akonyen nuka ekabaka: Esubit akesianut bala idouon luka akiru naka aiporo.

¹⁶Adumun acoa ejok ca ma itia adumun esabu! Eebo, ejok aseun ajeaun itia epuesa.

¹⁷ Erot lokapolon loka luitenara ŋes anyoun karonis: Loericit erotoke itajari aijarake.

¹⁸Iŋarenikinit eitur amudiario, Emoyo da loiwoŋoono iŋarenikinit aibiror.

¹⁹Ejok ajaut kemoyo loitasono mama ejaas lukican, Itia akorokoro luŋatuna kalukeitur.

²⁰ Ŋol loibwaikini eketau akirot edumuni ajokis, ŋol da loemuno EJAKAIT ejaas kalakara.

²¹Lukacoa kotauon enyaritai luecobe: Ajijim da naka aituk iyatakini aimaima.

²²Ajenun ŋes atan naka aijar mama ejai ŋol loejaatar: Konye abaŋaanut ŋes aiticanet naka ibaŋiok.

²³ Isisianakini etau loka lokacoa aitukuke, Iyatakini da aimaima aŋajepeke.

²⁴Akiro nuisiyalamikinete esubito bala akap nuka ao, Ejijimikinito aijar, ido eraas aŋaleu naka akojo.

²⁵ Ejai erot loeomit etuŋanan bon ebe ejok, Konye osaŋeke kes irotin luka atwanare.

²⁶Aiŋobel naka ekeswaman iswamakini ŋes aswam; Naarai isinyikokini akeituk.

²⁷Epwakuni etuŋanan lotai ameŋeranut; Esubito akiroke bala akim naenomori.

²⁸Eyei etuŋanan lomagul epeget: Ido etiaki ekedeideon ipapero.

²⁹Ijodijodi lokelepa ekeidurryet, Kosodi ayaŋaar toma orot lomam ejok.

³⁰Ŋol loeedi akekonye ŋes aipwak akiro numagul, ŋol da loebutarit itodolikini aronis.

³¹Akou naabwaŋut akorwo ŋes aboko nakaibuses: Edumunun korot loka adolit,

³²ŋol loiyapi aayunyurikin ejok aitelekarit ikagogoŋok: Ŋol da loeyait ekemoyo itelekarit loeŋatari ere.

³³Ilamilamakinio eroet ogoen, Konye EJAKAIT ŋes itebeikini.