Read Ateso Awaragasia 17 Bible Online

Awaragasia 17 - Ateso bible

Awaragasia 17

¹Ejok aiban neejai aiyapaara, Itia ainyam epucit kotogo loeleleba aŋolopa.

²Ebulesit lokacoa eyai ikoku yeniswamai nukileic, Ido irumi airumet koinacan.

³ Amot ŋes ililiaunere epuesa, eupa da esabu; Konye EJAKAIT itemi itauon.

⁴Ibwaikini loiswamai aronis eketau neejaas aituke nueroko: Iirari da lokeŋalan aŋajep naka ameŋeranut.

⁵ Loemocar lukican emoromoroi Lokasubanike: Ŋol da loisiyalamikinit ican mam eswaki aiticanio.

⁶Idwe luka idwe kes aboko naka imakio; Aibuses da naka idwe ŋes lukapapakec.

⁷Mam ibusakinit lobaŋ einer nuepolok: Ido bo do aituk nakaiŋal ibusakinit biai lokapolon?

⁸ Esubit ainakinet bala amoru nakarereŋ kakonye nuka ŋol kaloejaatar ŋin: Ekerianari neibelokinor kere.

⁹Ŋol loerapakini aibucaret emoi amina: Konye loicecemono etiaki ipapero.

¹⁰Elomari noi aitoronio toma otuŋanan lokaijen, Aitelekarit ibelai akwatat kaneejai lobaŋ.

¹¹Etuŋanan lokaronon emoi epali bon; ŋes kijukarere ekiyakia loededeŋ mamakeŋ.

¹²Ejok etuŋanan airiamakin kadubu naedemaritai ikedwe, Itia airiamakin ebaŋ kabaŋaanutuke.

¹³ Loetacakini aronis itia ajokis, Mam enyouni aronis kokaleke.

¹⁴ Ageunet naka ecelet esubit bala etuŋanan loepeduni akipi: Aso do kinyek epeget, eriŋa ejauna aŋolopa.

¹⁵ Ŋol loitojoki lokaronon, ka ŋol da loititelekari ekadoliton, Eraas kesi kere luketal kaneejai EJAKAIT.

¹⁶Kanukinyo ejaatar lobaŋ apesan akanike agwelia acoa, Kwabo emamei ŋes aijen?

¹⁷Emina epapero apaarasia kere, Ido onace euritai kanuka apakio nuka ican.

¹⁸Etuŋanan loemamei aijen ititiŋi akan, Eraun ekabwoaran kakonyen nuka eidunyeteke.

¹⁹Loemina ecelet emina aibucar: Ŋol da loitoojari ekekike emoi amudiario.

²⁰Ŋol loemagul etau mam edumuni ajokis: Ŋol da loemagul aŋajep ibirokin aronis.

²¹Loeurie ebaŋ eanyuni ican: Papa da loka ebaŋ mam iyalama.

²²Etau loelakara ŋes ekia loejok: Konye emoyo loebilil itooni akojo.

²³ Ijauni ekaronon ainakinet katorob, Aibelokinio irotin luka etube.

²⁴ Ejai acoa akonyen nuka ŋol kaloejai aijen: Konye akonye nuka ebaŋ ejaas osaŋeta luka akwap.

²⁵Okoku lobaŋ itakadikini papake, Ido erai adwaris mama ejai nakeurie ŋes.

²⁶Ido mam ejok aitican ekadoliton, Karaida aile isotia kanuka aitenarakec.

²⁷ Loitikokini akekiro ejaas kaijen: Etuŋanan loejai emoyo loelilim emisiana.

²⁸Lobaŋ da arai ililiŋi enyaritai lokacoa: Arai ebutarit eomitai loecobe.