Read Ateso Awaragasia 18 Bible Online

Awaragasia 18 - Ateso bible

Awaragasia 18

¹Ŋol loetiakar bon emoi ekeimiel elopet, Epega kacoa kere naeŋalei.

²Mam ebaŋ isiyalamikinit aijen, Konye ekoto apukonor nukotauke.

³Arai kebu lokaronon, ebuni da amwaŋio, Ido aitisilio da ebuni kamoromoroo.

⁴ Akiro nuka aituk naka etuŋanan esubito bala akipi nuidulok; Atan nakacoa erai aguurut naelelei.

⁵ Mam ejok acamun akonyen nuka lukaronok, Karaida aireŋe Iokadoliton kotube.

⁶Aŋajep naka ebaŋ eyauni epeget, Iriuni da akeituk aleio.

⁷Aituk naka ebaŋ ŋes amudiarioke, Aŋajepeke da ŋes eic loka aijarake.

⁸Akiro nuka ekerupean esubito bala edia loejijim, Elomarete toma atutubeta nukotoma nuka akoik.

⁹Ŋol da loijalijala kotoma aswamuke, ŋes onace kaŋol kaloemudiari.

¹⁰ Ekiror loka EJAKAIT ŋes ere loegogoŋ: Ekeri ekadoliton nen kosodi aiyar.

¹¹Abara naka ekabaran ŋes ekere loegogoŋ, Kwape karwatat naeoja kotoma aomisioke.

¹²Eriŋa emudiara, iturokina etau loka etuŋanan, Aitasonikin da iŋarenikinit aibuses.

¹³Loeboŋokini koriŋa epupuno, ŋes abaŋaanut ka ileic kamakeŋ.

¹⁴Emoyo loka etuŋanan etitiŋikini adekake; Konye iŋai bo epedori atitiŋikin emoyo loebilil?

¹⁵ Etau loka Ioecobe edumuni aijen; Akit da naka lokacoa emoi aijen.

¹⁶ Ainakinet naka etuŋanan enyaikini ŋes aibois, Ido itodoli akonyen nuka lukapolok.

¹⁷Loisiauni aosan esubit bala ŋes edolit; Konye ebuni ekeidunyet, kosodi aiŋic.

¹⁸Itanaŋi eroet ipegeta, Edieki da ikagogoŋok.

¹⁹Arai kenyunyrikin onac etiono ainyakun aitelekarit ere loegogoŋ: Ipegeta luikote nen eputokinos katiketa nuka ere.

²⁰Akoik naka etuŋanan ilelebun araito nuka aitukuke; Imonikini da keiyas naka aŋajepeke.

²¹ Atwanare ka aijar ejaas toma apedor naka aŋajep: Ka ŋul da luipudasi ŋes enyamete araitoke.

²²Loedumuni aberu edumuni ajokis, Edumuni da asianut naka EJAKAIT.

²³ Imaimaitoi lokican: Konye isiejanakini lokabaran.

²⁴ Loisipaperi luipu iriuni amudiario: Konye ejai epapero loimorikikina noi aitelekarit onac.