Read Ateso Awaragasia 20 Bible Online

Awaragasia 20 - Ateso bible

Awaragasia 20

¹ Erai, ebino ekamwaŋan, nuitemerete da ebenyaka: Loiriaŋitoi kanuka ŋun emamei acoa.

²Etasuro loka ekabaka esubit bala agat naka eŋatuny: Loitunyunyurikini ŋes emunaari aijarake.

³ Itubusikini etuŋanan atiakar kopeget: Konye ekoto ŋolibaŋ aŋolopa.

⁴Eneri loeloŋwana akoru kapak naka ailob; Emootoi kedolu aisak, mam edumuni ibore.

⁵Ainerun nakotoma otau loka etuŋanan esubit bala atan naidul; Konye epedori etuŋanan lokaijen aiwok.

⁶ Ilabilabete ituŋa luipu ŋolituŋanan akesianut: Konye iŋai bo epedori adumun etuŋanan lomunot?

⁷Etuŋanan loedolit loelosenenei kabeiteke, Isirereŋitoi ikedwe luetupanakinete ŋes.

⁸Ekabaka loiboie koicoloŋoke loka aitub Epietari aronis kere kakonyeneke.

⁹ Iŋai epedori atemar atiar, “Etalau ekatau, Arai loasegara kotoma aronisika”?

¹⁰Imisanin luegelegela ka, aitemisio nuegelegela, Eraas kere luketale kaneejai EJAKAIT.

¹¹ Ikoku yenididi da ejenunio kanuka aswamisioke, Arai esegara aswamuke, arai ejok.

¹² Akit naiirari, akoŋu da naeseseni, EJAKAIT ŋes esubit kere.

¹³ Sirimina ajo kinyek adolore ailwaritoi; Kokwenyut akonikonyen, kosodi kimonikin inyamat.

¹⁴Ebala ekagwelan ebe, “Erono, erono.” Konye keeka, ŋes do ituror.

¹⁵Ejai esabu ka amor nukareŋak nuipu noi: Konye aituk naka aijen ŋes ibore yenika akais nuipu.

¹⁶Kolema anapito naka ŋol kaloebwoari eloŋwau, Korau ŋesi aititiŋet loebwoari nakerimon.

¹⁷Ejijimikini etuŋanan atap naka aiŋal; Konye kokau ilelebunos iŋaroi aitukuke.

¹⁸Ŋin nailosikini itogogoŋitai kainerun: Koji ejie kaiŋarenikinio nakacoa.

¹⁹Loirimirimi kideideonokini epukori nukaiyeiyea: Aso siriupasi kaŋol kaloeooŋanari akeituk.

²⁰ Loilami papake arai totoke, Itudeŋio atalake kamuton naejesi cucucuc.

²¹ Airumet nairasakini adumun kageunet, Mam isirereŋitoi kawasiake.

²² Sirikitema atiar, “Enyaŋi aronis”: Kidareu EJAKAIT, ŋes da kitajari jo.

²³Aitemisio nuegelegela eraas nuketale kaneejai EJAKAIT; Emisani da lokeŋalan mam ejok.

²⁴ Alosito nuka etuŋanan eraas nuka EJAKAIT. Ikwaikini ai epedori etuŋanan ajenun erotoke?

²⁵Erai eic kaneejai etuŋanan aisunyit atemar atiar, “Erai lokalaunan,” Kosodi kedau aiyapo iŋisi.

²⁶Epiesi ekabaka lokacoa ikaronok, Ido eyauni agali nakicomis kujukec.

²⁷Emoyo loka etuŋanan ŋes atala naka Edeke, Eŋici atutubeta kere nukotoma akoik.

²⁸Itajarete aitim ka abeit ekabaka: Ido aitim ŋes iganuni ekeicoloŋ loka ajakanut.

²⁹Aibuses naka ikatumunak ŋes agogoŋukec: Atemelel da naka imakio ŋes akoruo nuka akwesikec.

³⁰Apipil naka imacarin itesegari aronis: Ibelai da italaunete atutubeta nukotoma.