Read Ateso Awaragasia 22 Bible Online

Awaragasia 22 - Ateso bible

Awaragasia 22

¹Tiejok aseun ekiror loejok itia abar naepol, Ido asianut nakamin itia epuesa ka esabu.

² Iriamanakinos lukabarak ka lukican: EJAKAIT ŋes ekasubanikec kere.

³ Eanyuni etuŋanan loecobe aronis, kosodi aiŋop: Konye itorete lujimat nen, iticanio.

⁴Eropit lokaitasono ka ayoŋit EJAKAIT, ŋes abar, ka aibuses, ka aijar da.

⁵ Ejaas ikukwa ka iica korot loka lomagul: Ŋol loidara bon elwaniar kamakec.

⁶Kitanaik ikoku erot loibusakinit alosenenoo, Karaida kemojoŋ mam enyouni kanen.

⁷Eyait lokabaran lokican, Loeyuuna da erai ebulesit loka loeyuuni.

⁸ Loeyei numam adolit esaki ilou: Edaun da ebela loka anyunyurake.

⁹Isirereŋitoi loeja kakonye nuesiaka; Naarai einakini lukican inyamatake.

¹⁰Kireŋea ekamwaŋan, emamuun da epeget; Eebo, enaŋi aŋolopa ka amoromor.

¹¹Loekot etau loesegara, Kanuka asianut naka aitukuke ŋes eraunor ekabaka epaperoke.

¹²Esesenete akonye nuka EJAKAIT ŋol loejai anen, Konye itapalauni akiro nuka etuŋanan loebili ibotei.

¹³Ebala loeloŋwana ebe, “Ejai eŋatuny kiŋa: Kaari korot.”

¹⁴ Aituk naka aberu kanaadote ŋes aipany naidul: Kenyunyuriki EJAKAIT etuŋanan ibirokini nen.

¹⁵Eenitai abaŋaanut kotoma otau loka ikoku: Konye ibelai lukalecor ireŋearete neelwana kamakeŋ.

¹⁶ Ŋol loeroikini lokican adumunia amedake, Ŋol da loeinakini lokabaran iboro, edolokini ŋol aibabanitoi.

¹⁷Kitoik akonikit, kiira akiro nuka lukacoa, Kibwaik da ekonitau mama ejai akaijen.

¹⁸Naarai ejok arai irici kes kotomakon, Arai icasito kaitukukon.

¹⁹Kojai amunonutukon neejai EJAKAIT, ŋes ketejenunia lolo jo da.

²⁰Mam kereka kewadikakinit jo akiro nuejokuka noi, Nuka ainerun ka nuka aijen da?

²¹ Aitejenikini jo cut akiro nukabeit, Tetere iboŋokini akiro nukabeit ŋul lukijukarito.

²² Siriŋasi lokican, naarai icana, Karaida aroikin luiticanio korute.

²³Naarai epurokini EJAKAIT kes, Ido eŋatari aijarakec kaŋul kaluenasete.

²⁴Sirikisipaper etuŋanan loenyunyurana; Siriupasi ketuŋanan loisiopana:

²⁵Kinyek aisisiaun ikerotin, Ipoki aijarakon koic.

²⁶Sirijaananas kaŋul kaluititiŋete akanin, Kaŋul kaluebwoanarete lukapesenin:

²⁷Arai imameete jo lutacakinet, Kanukinyo ma eyaŋaaria ŋesi aperitikon kamakon?

²⁸Sirikijul aanyunet naka eikor losek, Nakesipokinete lukapapaakon.

²⁹ Iany etuŋanan ekukurikinit aitaaritoike? Ebwoi ŋesi kakonyen nuka ikabakan; Mam ebwoi kakonyen nuka ipasoi.