Read Ateso Awaragasia 23 Bible Online

Awaragasia 23 - Ateso bible

Awaragasia 23

¹Arai kiboikin aimor nepepe kalokapolon, Koomoom noi loejai kakonyenekon;

²Kibwaik ekileŋ ologorotokon Arai irai ijo etuŋanan lokeraŋa.

³Sirikiŋobel lukajijimakake; Naarai kes inyamat lukaimod.

⁴ Siritaaritoi adumun abar; Kopalu acoakon ŋin.

⁵Igipakinit cabo akonikonyen ibore yenemamei? Naarai abeit esubuni abar abebenoka, Kwape emorukaalet loeporori kuju noi.

⁶ Sirinyamenenei inyamat luka ŋol kaloibitiono, Karaida aiŋobel lukajijimakake:

⁷Naarai kwape eomitor ŋesi kotomake, ikoni nen: Kiitema ŋesi jo ebe, “Konyam, komat”; Konye etauke mam ejaas nepepe kajo.

⁸Ilekari aoduneta nuinyama, Kosodi atwaniar akirokon nuejok.

⁹ Sirinera kopupi ebaŋ; Naarai emeni ŋesi acoa naka akonikiro.

¹⁰Sirikijul aanyunet naka eikor losek, Karaida alomar omanikoria luka luemameete lukapapakec:

¹¹ Naarai egogoŋ Ekalakunanikec; Epurokini ŋesi kes aluikin jo.

¹²Kibwaik ekonitau toma aisisianakinio, Akiikon da akiro nuka aijen.

¹³Sirikitikok ikoku apucunio; Arai kileco ŋes kebela mam etwani.

¹⁴ Koleco ŋes kebela, Koyu aijarake kokatwak.

¹⁵Okokuka, arai kecou etaukon, Iyalamikini ekatau, loka ba:

¹⁶Eebo, elelete ikaŋeretenya, Arai inera akoniituk nukajokak.

¹⁷Kinyek ekonitau aikokoteikin ikadiakanarak: Konye kojaenena kayoŋit EJAKAIT aitiwar akwap.

¹⁸ Naarai abeit ejai eropit; Mam etwaniari amunonutukon.

¹⁹Kiira ijo, okokuka, kocou, Kiteteni ekonitau korot.

²⁰ Sirijaananas kaŋul kaluemeranakinos; Kaŋul da luisinyooko ainyam akiriŋ:

²¹Naarai edolokini ailwaritoi ekameran ka loisinyoono: Ailuranar da itanapi etuŋanan inyilinyilia.

²² Kiiranari papakon lokiwuriei, Ido sirimwaŋenenei totokon kemojoŋ.

²³ Kogwel abeit, sirigwelanari; Eebo, kogwel acoa, ka aituutoorio, ka ajenun da.

²⁴Iyalamikini noi papa loka ekadoliton: Ŋol da loeuriei ikoku yenikacoa isiyalamikini ŋes.

²⁵Kiyalamikinos papakon ka totokon, Kolele ŋin nakiwuriei jo.

²⁶Okokuka, ae ekonitau, Kisiyalamikis akonikonye ikarotin.

²⁷Naarai erai naadote asoogot naidul: Erai da aberu nakerimon aipany naedidiŋ.

²⁸Eebo, eperuni bala ekerurwon, Iyatakini luebilete ibotei kotuŋa.

²⁹ Iŋai bo eburunit? Iŋai bo eanyunit ican? Iŋai bo ejai aŋolopa? Iŋai bo eŋuuriani? Iŋai bo ejaas amusuŋun nuutai? Iŋai bo da itereŋit akonye?

³⁰Kes ŋul luinoosikinos toma ajon: Kes ŋul luelosete airi ajon nuinyalinyala.

³¹Siriseseni ajon nueupapanata, Kitodias aputokec kotoma adere, Naijililiarotor.

³²Kokau kitodete bala emun, Kiswalarete bala emusaga.

³³Eanyunete akonikonye nuilocokino, Ineranakin ekonitau da epali.

³⁴Eebo, isubi bala ŋin yeneperi kataro, Arai yeneperi kokuju opir loka ataker.

³⁵ Inera ijo kwana ebe, “Kebuŋai, komam arieba: Kenomonomoi, komam ajeni: Akwenyuni wori? Kerii bobo kes.”