Read Ateso Awaragasia 24 Bible Online

Awaragasia 24 - Ateso bible

Awaragasia 24

¹Sirikikokotik ituŋa lukaronok, Karaida aiŋobel ajaun kakes.

²Naarai inerunete ikecetauon emwaŋit, Inerasi akeceituke da nukameŋeranut.

³Edukio etogo kacoa; Iticasio da kajenun.

⁴Aijen da isilelebi agolaike, Kabara kere naka akais nuipu ka naisiyalamikinit.

⁵Egogoŋ etuŋanan lokacoa; Eebo, iyatanakini etuŋanan lokaijen apedor.

⁶Naarai ijii ekonijie kaiŋarenikinio nakacoa: Kaipues da naka ikenerunak ejai ainapakin.

⁷Ikiara acoa mam ebaŋ edolokini: Mam ewooŋi akeituk korute.

⁸Loepeleikini aswam aronis Emaikinete ituŋa emeŋerana.

⁹ Awomisioit nakabaŋaanut ŋes aronis: Ekamwaŋan da ŋes loketal neejaas ituŋa.

¹⁰Arai kiilor kapaaran naka ican, Edit akonigogoŋ.

¹¹ Koyuununei ŋul lueyaŋaario atwanare, Kitikok da ŋul luiriaŋaros aario.

¹² Arai kitemari ebe, “Koany, mam kijenunit ŋin,” Ŋol loitemi itauon mam kereka eomoomoi? Ŋol loerici aijar, mam ejeni? Mam da etacakini ŋolituŋanan kwape ejaar akeswam?

¹³Okokuka, konyamenenei esik loka ao, naarai ejok; Akekape da, nuejijimikinete akonianyigol.

¹⁴Kojenu da kwaŋin acoa kotoma otaukon: Arai kidum ŋes, ejaun eropit, Mam etwaniari da amunokon.

¹⁵Ijo etuŋanan lokaronon, sirikiperu etogo loka ekadoliton; Sirikiŋat akeibois naiyenununa.

¹⁶ Naarai ibironori etuŋanan lokadoliton aatenak akanykaarei, enyoununei da: Konye elatarete ican lukaronok.

¹⁷Sirikibwoŋak lokasurupikon naibiroror, Kinyek ekonitau aiyalamikin naelatakinere ŋes kwap:

¹⁸Kinyek EJAKAIT aanyun, kosodi akadakin, Kibelok akenyunyura anyoun kamakeŋ.

¹⁹Sirikiyaloŋoŋ kanuka luiswamaete aronis; Sirikikokotik lukaronok:

²⁰ Naarai mam ekaronon edumuni eropit; Itudeŋio atala naka ekaronon.

²¹ Okokuka, koyoŋenenei EJAKAIT ka ekabaka: Ido siriupananas kaŋul kaluekotosi ailoconokin:

²²Naarai itiunete epolakec; Iŋai bo da ejeni amudiariokec?

²³ Nu da nuka lukacoa. Mam ejok atiakit ituŋa kotube.

²⁴ Ŋol loetemari lokaronon atiar, “Idolit ijo”; Ikenete ŋes ituŋa, elaete ŋes atekerin.

²⁵Konye iyalamas ŋul luitoronete ŋes, Edolokini da kes arereŋ naejok.

²⁶Aituk naebonokini ejok ŋes enui.

²⁷Kitemonok akoniswam kokiŋa, Kitemok ekonimanikor; Kosodi konyet aiduk ekonitogo.

²⁸ Sirikiraun ekajenan aluikin eidunyetekon komam akirot; Ido sirikiŋala kaitukukon.

²⁹ Sirikitema ebe, “Eswamakini ŋes kwape keswamakinia eoŋ; Atacakini ŋes kwape ajaar akeswam.”

³⁰Abu keriria emanikor loka loeloŋwana, Emanikor da loka emusabibu loka ŋol kaloemamei aijen;

³¹ Ido koany, ebwaŋunito ikukwa kere, Iswapito ikodokodo, Etiyaara arwatatake nakamor.

³²Kasodi aanyun, kaomoom noi jokan: Kaany, ketuutoor.

³³ “Ajo nuikidioko, ailuranar naedit, Ailokony akanin nepetai arior ajotoor”:

³⁴Kwaŋin kibunokini jo ailwaritoi kwape ekerurwon; Ka eipudikon da kwape etuŋanan loekapit ebuku.