Read Ateso Awaragasia 26 Bible Online

Awaragasia 26 - Ateso bible

Awaragasia 26

¹ Kwape akaka kapak naka akamu, ka akiru da kotoma aisak, Kwaŋin mam aibuses ibusakinit ebaŋ.

² Kwape inyiporit kairimike, kwape iporoidoliat kaporitoike, Kwaŋin mam ekenit lotaai ecamuni.

³Edaset kanuka ebalasit, amuny kanuka asigiria, Ka ebela da kanuka epura loka ebaŋ.

⁴ Mam iboŋokini ebaŋ kwape ejaar akebaŋaanut, Kinyek ijo da aputoor ŋes.

⁵Koboŋok ebaŋ kwape ejaar akebaŋaanut, Kinyek araun lokacoa kotoma aomoomoke.

⁶Ŋol loiyakiari akirot kakan naka ebaŋ, Ejepi akekeje, emasi akaje.

⁷Kwape akeje nuka loicodo, nuilejekekas; Ikoni nen awaragan kaituke nuka ibaŋiok.

⁸Kwape loeenikini alicait toma aporocet, Ikoni nen ŋol loeinakini ebaŋ aibuses.

⁹Kwape ekukwai loicumi akan naka ekameran, Ikoni nen awaragan kaituke nuka ibaŋiok.

¹⁰Kwape imusunia ekaguman ŋinituŋanan kere, Ikoni nen loisiwotei ebaŋ ka loisiwotei luitorete kere.

¹¹ Kwape ekiŋok loeboŋori toma alekanake, Ikoni nen ebaŋ loinyogonokini akebaŋaanut.

¹²Iany kereka ijo etuŋanan loeomikina ebe erai lokacoa? Ipedori amunokin ebaŋ aitelekarit ŋes.

¹³Ebala loeloŋwana ebe, “Ejai eŋatuny kiŋa! Ejai eŋatuny orot.”

¹⁴Kwape ibelonokinor ekirigi kotoma aenetake, Ibelonokini kwaŋin loeloŋwana kaperitike.

¹⁵Idomakini loeloŋwana akanike atuba, Isilolonyi ainyakun bobo aitukuke.

¹⁶Eomikina loeloŋwana araut lokacoa, Aitelekarit ituŋa ikanykaarei luepedorete aboŋokin kacobeu.

¹⁷Loitorit kosodi aiilokin opeget lomere loke, Esubit bala etuŋanan loitiŋi ekiŋok kaki.

¹⁸Kwape lokikerep loecakari akalasia, Imalia ka atwanare;

¹⁹ Ikoni nen etuŋanan loiŋalai ekeidunyet, Kobala ebe, “Mere emocet bon?”

²⁰Eduŋei akim arai emameete akito: Epalunio epeget arai emamei ekerupean.

²¹ Kwape akuk toma atotol nuesaranete, ka akito toma akim; Ikoni nen etuŋanan loeŋolopana isinepuni epeget.

²² Akiro nuka ekerupean esubito bala edia loejijim, Elomarete toma atutubeta nukotoma nuka akoik.

²³ Aituk naimaimai, etau da lokaronon, Esubito bala amoti naka elupe nailadatai kelele loka epuesa.

²⁴Loelait emodi kaitukuke, Konye iŋadakinit aiŋal tomake.

²⁵Nainerar nukasianut sirikiyuu; Naarai kotoma otauke ejaas nuketal akanykaarei.

²⁶Karaida erapari elaitike kapirianut, Konye itodunio aronisike kakonyen nuka ekodet

²⁷ ŋol loeboki aipany ibirokini nen: ŋol da loikokoriori amoru, eboŋuni mamake.

²⁸ Aŋajep nakeŋalan elai ŋul luereit; Aituk da naemai iswamai amudiario.