Read Ateso Awaragasia 27 Bible Online

Awaragasia 27 - Ateso bible

Awaragasia 27

¹ Sirikilabilab nuka moi: Naarai mam ijeni nunyoika nueyaŋauni apaaran.

²Kitur ecetuŋanan jo, mere akoniituk alopet; Ice, mere aŋajepekon alopet.

³ Elaŋiri amoru, eposik da asiŋe; Konye anyunyura naka ebaŋ itelekarit kere alaŋir.

⁴ Ededeŋ aisiop, elelei da anyunyura; Konye iŋai ca epedori aibwo kaneejai ekokote?

⁵ Ejok aitoronio naekaŋaikinio Itia amin naibwaitai.

⁶Numunon amusuŋun nuka epapero: Konye aŋueta nuka lukasurup ipu noi.

⁷Etuŋanan loimonikini cut inyaikin akapet nakao: Konye etuŋanan loeriebi eteŋei ejijimikinit ŋinibore kere yenedwar.

⁸ Kwape ikweny yenirimi anyoun kakaike, Ikoni nen etuŋanan loirimi anyoun kaiboisike.

⁹Isiyalamikini akinyet ka lueuru maa etau: Isiyalamikinit kwaŋin ajijim naka epapero loka etuŋanan kainerun nakotauke.

¹⁰Sirikijal epaperokon, ka epapero loka papakon; Sirikilot togo loka onacekon kapak naka iloukon: Ejok eidunyet loeapie itia onacekon loelwana.

¹¹ Okokuka, kocou, kisiyalamik ekatau, Kasodi aboŋokini ŋol lokamori.

¹² Eanyuni etuŋanan loecobe aronis, kosodi aiŋop: Konye itorete lujimat nen, iticanio.

¹³Kolema anapito naka ŋol kaloebwoari eloŋwau; Korau ŋesi aititiŋet loebwoari nakerimon.

¹⁴ Loilipakini ekepapero arereŋ keporoto loepol, edilokini anyoun tupuruc sek, Imario bala ekenit neejai.

¹⁵Aiit naduc kapaaran naetepia akiru naepol, Eputokinos kaberu naeŋolopana.

¹⁶Loekoto aitikokin ŋes, itikokini ekwam, Arai aibun akinyet kakekan nakoteten.

¹⁷Asuat ipeni asuat; Etuŋanan da ipeni kwaŋin akonyen nuka epaperoke.

¹⁸ Ŋol loekorienenei etini enyamenenei araitoke, ŋol da loijaanakini ejakaitike edakakinio aibuses.

¹⁹Kwape esesenatar akonyen kakonyen kotoma akipi, Kwape kwaŋin esesenatar etau loka etuŋanan ketuŋanan.

²⁰ Mam Okatwak ka Amudiario imonianakinos; Akonye da nuka etuŋanan mam imonianakinos.

²¹Amot ŋes ililiaunete epuesa, eupa da esabu, Itemio etuŋanan da kotoma aiturioke.

²²Karaida kicur ebaŋ kokisu karukit nepepe kalos, Mam akebaŋaanut enyouni kamakeŋ.

²³Kokukuranar ijo aijen isipaninikon luka amerekekin kwape ejaatar, Koŋicenenei noi isipaninikon luka aituk.

²⁴Naarai abar mam erai nakapaarasia kere; Ido ejaenena kereka aboko aitodol aturio kere?

²⁵Eŋerario anya, etakanuni do amel, Etukokinio da ikui luka iroŋan.

²⁶Kitudumikinete idwe luka amerekekin lunapanakon, Akinei da kes akais nuka imanikoria:

²⁷Ejaunos akile nuka akinei nukidaunete aitanyam jo, ka aitanyam da lukokalekon; Ka nuitania apesurukon.