Read Ateso Awaragasia 28 Bible Online

Awaragasia 28 - Ateso bible

Awaragasia 28

¹Ekerete lukaronok komamei etuŋanan loetupakini: Konye ikadolitok etitiŋikinete kwape keŋatuny.

²Kanuka aidiak naka akwap ipuakaros ikapolokoke: Konye kanuka ituŋa luejai acobeu ka aijen iyatakini apolouke ajaenena.

³ Loilwaritoi loeroikini lukican Esubit bala akiru naekusi naegiriari inyamat kere.

⁴ Luejalete ikisila ituritos lukaronok: Konye ŋul luericete ikisila itoŋolopete kes.

⁵ Ituŋa lukaronok mam ejenunete etube: Konye ŋul luemoete EJAKAIT ejenunete akiro kere.

⁶Ejok lokican loelosenenei kabeiteke Itia ekabaran loemagul korotinike.

⁷Ŋol loerici ikisila erai ikoku yenikacoa: Konye ŋol loipaperikinos kituŋa luiraŋaka isurumi papake ileic.

⁸Loiyatakini iboroke kanuka luimedauna ka luiyatakina Etukonokini ŋesi ŋol loitimi lukican.

⁹ Loibelokini akitike kinyek apupun ikisila, Ailipike da erai naketal.

¹⁰ Loitapaari luitenara orot loerono, Ibirokini ŋesi elopet toma aipanyike, Konye luedoliorito irumete ajokis.

¹¹Eomikina loepalal akanin araut lokacoa; Konye lokican loejai aijen emisiikini ŋes.

¹²Naipikoriata ikadolitok, ejai aibuses naepol: Konye naenyounioto lukaronok, eŋopete ituŋa.

¹³Loibwai aibucaretake mam ekerianari: Konye ŋol loelimori kosodi aisac edumuni aitimio,

¹⁴ŋol loeyoŋit elakara apaarasia kere: Konye ŋol loitinikiki eketau ibirokini aronis.

¹⁵ Kwape eŋatuny loegat, ka adubu nairimi; Ikoni nen ekapolon lokaronon loeyait ituŋa lukican.

¹⁶Ido ekapolon loemamei aijen ejai noi kaimwaŋ; Konye ŋol loelait airaŋanut ebusi apaarasia nuipu.

¹⁷Etuŋanan loigugunatoi kaokot nuka etuŋanan ece kere, Ekereari toma aipany; emamei ediotuŋanan loitikuni.

¹⁸Eyuunio ŋol loelosenenei itenara: Konye ibirori atipet lokirotin lumagul.

¹⁹Loekoriei alupoke edumuni inyamat luipu: Konye ŋol loetupari aamameak edumuni ailwaritoi naepol.

²⁰Ipuakaros arereŋesio kaneejai etuŋanan lomunot: Konye loisunyakini aibar mam eswaki aiticanio.

²¹ Mam ejok atiakit kotuŋa: Karaida etuŋanan aibucar kanuka idisinyamat.

²²Loibitiono isunyakini aibar, Kwabo mam ejeni needolokinio ŋes ailwaritoi.

²³Loitoroni etuŋanan eminunio kokau, Aitelekarit ŋol loemai kaŋajep.

²⁴Loeŋasi papake arai totoke, kobala ebe, “Mam ŋin erono”; Ŋope ŋol ŋes epadic loka ekamudiaran.

²⁵ Loketau loiraŋana isidiki aŋolopa: Konye loemunokina EJAKAIT itutumio ŋes.

²⁶Loemunokina etauke bon ebaŋaana: Konye loelosenenei kacoa eyuunio.

²⁷Loekori mama ejaas lukican mam etwaniari ibore: Konye loitumudak akekonye edumuni ikenito luipu.

²⁸Naenyounioto ikaronok, eŋopete Ituŋa: Konye naeolioroto, iyatakinos ikadolitok.