Read Ateso Awaragasia 6 Bible Online

Awaragasia 6 - Ateso bible

Awaragasia 6

¹ Okokuka, arai kiraun ijo ekabwoaran eidunyetekon, Arai kititiŋ akonikan eloŋwait.

²Arai kipok kakiro nuka akoniituk, Kikamunio kakiro nuka akoniituk.

³Kiswama kwanata okokuka, koyuun bon; Naarai idoo ijo akan naka eidunyetekon; Kiwonya, kolot, kikanikan eidunyetekon.

⁴ Sirikicamak akonikonyen ajo, Karaida abukiokon ailuranar.

⁵Koyuun bon kwape amori kakan naka ekamejan, Ka akweny da kakan naka ekalokan.

⁶ Kolot mama ejai esuŋwoit, ijo loiloŋwana; Koomoom ikeponesio, kocou:

⁷Emamei ŋes ejakait, Ekaanyanaran, karaida ekayaiton.

⁸Idiasi ikenyamen luka akamu, Etukonokini ikenyamat kaidweny.

⁹Itodoli ai iperi, ijo loiloŋwana? Wori bo inyounio kajokon?

¹⁰ Ajo nuikidioko, ailuranar naedit, Ailokony akanin nepetai arior ajotoor.

¹¹Kwaŋin kibunokini jo ailwaritoi kwape ekerurwon, Ka eipudikon da kwape etuŋanan loekapit ebuku.

¹²Etuŋanan lotai, etuŋanan lomam edolit; Elosenenei ŋesi inera numagul;

¹³ Eedi kakonyeke, isuti kakejeke, Idodikini kibokoroke;

¹⁴ Ejai elepa otauke, Epwakununei aronis tiritir: Eyeenenei ŋesi ikinyom luka aŋolopa.

¹⁵ Kanuka ŋun ebunokini ŋes aronis katipet; Ebilio katipet, komamei aŋaleun.

¹⁶Ejaas akiro akanykape nuelait EJAKAIT; Eebo, akanykaarei nueraas nuketal kamakeŋ:

¹⁷ Akonye nuepogas, aŋajep nakeŋalan, Akanin da nuebukorete aokot numam akirot;

¹⁸ Etau loepwakuni aomisio nukaronok, Akeje nuisunyito akerit mama ejai ameŋeranut;

¹⁹ Ekajenan lokaiŋal loesabi, Ka ŋol da loeyei ikinyom luka aŋolopa koinacan.

²⁰ Okokuka, koric aicorakinet naka papakon, Sirikiner da aicor naka totokon:

²¹Kiminanakinenei kes otaukon, Koenanakini kes omurisiŋikon.

²²Nailosenenoo, kiŋarenikinenete jo, Naiperenenoo, kidarenenete jo; Naikwenyununaa, iyalaenenete kajo.

²³ Naarai aicorakinet ŋes atala; ekisil da ŋes aica; Aitoroneta nuka aituutoorio ŋes erot loka aijar:

²⁴Aricit jo kama kaberu nakaronon, Kaijodijod naka aŋajep naka nakerimon.

²⁵ Sirikiŋobel ajokisike kotaukon; Karaida acamun abukioke aipok jo.

²⁶ Naarai irii naadote adiotap, Konye nakeporon emejai aijar nakakais nuipu.

²⁷Epedori kereka etuŋanan aibwaikin akim otorobuke, Komam enyami ikenapen?

²⁸Arai bo itori etuŋanan atotole nuesaranete, Komam enomorete akekeje?

²⁹Ikoni nen ŋol loelomari mama ejai aberu naka eidunyeteke, ŋol kere loetirori ŋin mam eswaki aiticanio.

³⁰Mam kereka ituŋa emwaŋete ekokolan arai ekokoi Aisimonikin aijarake kerieb eteŋei?

³¹ Konye arai kedumun, etacakini irwan akanykaarei; Einakini iboro kere lukotogoke.

³² Ŋol loedotei emamei aijen; Loekoto amudiar aijarake iswamai ŋun.

³³Ebeikinete ŋes amusuŋun ka aitisilio: Mam akemorosit emwatario.

³⁴Naarai ekokote itunyunyurikini ekiliokit; Mam itimi kapaaran naka ainyaŋ.

³⁵Mam ecamuni lugelis; Mam italakario, karaida kiinak ŋes ainakineta nuipu.