Read Ateso Awaragasia 7 Bible Online

Awaragasia 7 - Ateso bible

Awaragasia 7

¹Okokuka, koric akiroka, Kiŋadak da aicorakinetaka mamakon.

² Koric aicorakinetaka, kojar; Ekakisil da kwape kecopot loka akoŋukon.

³ Koenanakini kes obokorokon; Kiwadikaenenei kes apukenit naka etaukon.

⁴Kolimok acoa ebe, “Irai ijo kinacika”; Komaik da ajenun apaikon:

⁵Tetere kidarete kama ejai aberu naadote, Kama ejai nakerimon nakijodijodi kakiroke.

⁶Naarai kadirisa nakotogoka, Kereik kapedotoka;

⁷ Kaany kotoma lujimat, Kamisiik kotoma okatumunak, Ekatumunan loemamei aijen.

⁸Itorit orot eapie kagorike, Kolot orot loebei togoke;

⁹ Napitiboŋi, apak naka atiboŋ, Napiriono akuare, kamuton.

¹⁰ Ido koany, kisiriama aberu ŋes, Kanapito nuka kanaadote, epiriana kotau.

¹¹ Ilebilebitoi ŋesi, irimi; Mam akekeje idoŋete oreke:

¹²Ejai do orotin, ejai do asisiarin, Eperuni da kaŋinigor.

¹³Ikamuni do je, konu, Etemari aeomilikonyen ŋes atiar:

¹⁴“Ejaas asuban nuka ainapakin oreka; Lolo ŋes etodolio aiyaposioka.

¹⁵Ŋes alomunia aisiriam jo, Adunyakinit amoot akonikonyen, kadum jo.

¹⁶ Apesit etutika kaimuketa, Kigoen lucererin lukiusiok lukoMisiri.

¹⁷Abwatanakinit akaperit Kemina, ka icicikwa, ka akinomon.

¹⁸Kaloto, kemonikinos amin kiton atupuruc; Kalakanaros kamin.

¹⁹Naarai emamei okilenika kore, Elosit neelwana:

²⁰Ayaŋa eriagi loka apesan nepepe kaŋes, Eboŋuni ore naikesakinia elap.”

²¹Kakiroke nuipu nuejok kimaima ŋes, Kaijodijod naka aŋajepeke kitiŋaiki ŋes alosit.

²²Kotupak ŋes katipet, Kwape elosio emoŋ aario, Arai aeneta alecor ebaŋ:

²³Aitodol naicumia emal emanyike; Kwape iwonyaria akweny aracit, Komam ejeni ebe eyaŋaari aijarake.

²⁴Aso do, ikadwe, kopupunoi, Kibwaikis akiro nuka aitukuka otauon.

²⁵Sirikitoik ekonitau orotinike, Sirikipaa osokonoke.

²⁶ Naarai alataki luipu kwap imusuŋitai, Eebo, lueari ŋesi kere kes ajore naepol.

²⁷ Eketogo ŋes erot loebei Okatwak, Ijesari agolai nuka atwanare.