Read Ateso Awaragasia 8 Bible Online

Awaragasia 8 - Ateso bible

Awaragasia 8

¹ Mam kereka ikalalat acoa, Ido mam iworoi ajenun ekeporoto?

²Ebwoi kasisiarin, Kaneimukurur kariri naka erot.

³Ikalalat kariri naka irutei, Kane elomarere ore lokapolon, Kokekia kane elomarere toma, atiar:

⁴“Ikatuŋa, keworoto yes; Ekaporoto da ejai mama ejaas idwe luka ituŋa.

⁵Yes lujimat, kojenut apirianut; Ka yes da lubaŋiok, kojautu ketau loka ajenun.

⁶ Kiirasi; naarai eneri akiro nukajokak noi; Aooŋ da naka akaituk elomunete akiro nuedolito.

⁷ Naarai inera akaituk abeit; Erai aronis naketal kaŋajepeka.

⁸Akiro kere nuka aitukuka eraas adolit; Emamei ibore yenimagul karaida yenepaarit kotoma.

⁹Ideleleete kere kama ejai ŋin yenejeni, Ido itenara kama kaŋul kaluedumunete aijen.

¹⁰Kodumutu akaisisianakin, kwabo mere epuesa; Ido aijen aitelekarit esabu loseuna.

¹¹ Naarai acoa ejok aitelekarit amor nukareŋak nuka akais; Iboro da kere luimielai mam epedorio aitiirian kaŋes.

¹²Eoŋ Acoa etuluo apirianut ekatogo, Amoot da aijen ka ainerun.

¹³ Ayoŋit EJAKAIT ŋes aisac aronis; Aiwoŋonut, ka eitur, ka erot lokaronis, Ka aituk naepaarit, kes nuasacit.

¹⁴ Ainerun erai nakaŋ, ka aijen naicasit; Arai eoŋ ajenun; ajai kagogoŋ.

¹⁵ Kanukaŋ irumete ikabakan, Icorakinete da ikayaitok abeit.

¹⁶Kanukaŋ eyaitos ikapolok, Isotia ka ikatubok kere luka akwap.

¹⁷ Amina ŋul lukaminas eoŋ; Ka ŋul da lukadunyakinito amoot kaanyunete.

¹⁸ Abar ka aibuses ejaas keoŋ; Eebo, abar namam edaun ka adolit.

¹⁹ Akaraito ejok aitelekarit esabu, eebo, esabu lokajokan; Ekaiyas da aitelekarit epuesa loseuna.

²⁰Etorit orot loka adolit, Kidiŋ osokono luka etube.

²¹Tetere esurumi lukaminas iboro ŋul, Tetere esilelebanari da akeceiŋadisia.

²² Abu EJAKAIT kasub eoŋ ageunet naka aisubuke, Nasodit naka akeswamisio nupeŋo.

²³ Aponi keticasi kole kasonya, kageunet, Eriŋa akwap kejauna.

²⁴Aponi kasubi naamamear ataro, Naamameatar atanin nuedilas akip.

²⁵ Eriŋa kiticata iroŋan, Aponi eoŋ kasubi ageikin iukon.

²⁶Eroko ŋes kesuba akwap, karaida ais, Karaida nugeet nuka apua naka akwap.

²⁷Nakitemokinio ŋesi akuj, ajai eoŋ: Nakelukunia eikor loka ataro:

²⁸Nakiticasia idouon kokuju: Nakitogogoŋio akonye nuka ataro:

²⁹ Nakeinakinia aŋolol eikoruke, Tetere mam akipi etubete aicorakineteke: Nakigiria apeteta nuka akwap:

³⁰ Ajai do eoŋ kaŋes, kwape akeswaman naejok, Arai eoŋ aiyalamake ŋinipaaran, Kalakanar kakonyeneke tiritir:

³¹ Kalakanar kakwapuke naepedorio aiboikin: Ajai akaiyalama neejaas idwe luka ituŋa.

³² Aso do, ikadwe, kopupunoi: Naarai isirereŋitoi ŋul luericito ikaponesio.

³³Kopuputu aituutoorio, koraut lukacoa, Sirikiŋeroto.

³⁴Isirereŋitoi etuŋanan lokapupuni, Irereenenei ŋinipaaran oruteika, Idareununei kacuneta nuka ikiriginika.

³⁵ Naarai ŋol lokadumuni eoŋ, edumuni aijar, Ejaun kasianut naka EJAKAIT.

³⁶ Konye ŋol loediaki kamakaŋ iticani akeijar: Ŋul da kere lukalaito eminas atwanare.”