Read Ateso Awaragasia 9 Bible Online

Awaragasia 9 - Ateso bible

Awaragasia 9

¹ Aduk acoa eketogo, Asipok ikepirin ikanykaarei:

²Aar iketiaŋ; enyalinyala ebinoke; Etemok da ekemesa.

³ Abu kiyakia akepesur aiwor Kaiboisio nuiceleleete nukore.

⁴ Ebe: “ŋol lojimat, komanu lailo.” Etemari da ŋesi ŋol lomam acoa atiar,

⁵ “Kopotu, konyamata akatap, Komata ebino loenyalinyalit.

⁶Kinyeis ajimat, kojarata; Ido kolosenenete korot loka ajenun.”

⁷Ŋol loeriemiriemei ekesekelon erasio, ŋol da loitoroni ekaronon emoromoroo.

⁸ Sirikitoron ekesekelon, kinyek aila jo; Kitoron lokacoa, kiminuni ŋesi jo.

⁹ Kituutoo lokacoa, iyatakini acoun: Kisisianak ekadoliton, iyatakini da aisisiaun.

¹⁰ Ayoŋit EJAKAIT ŋes ageunet naka acoa: Aijen Lokalaunan ŋes ajenun.

¹¹ Naarai kanukaŋ ipuatar akonipaarasia, Iyatanakinotor da ikar luka aijarakon.

¹² Arai ijai kacoa, ijai kacoa kanukon: Arai da isekeli, eraas ŋun nukon.

¹³Ilebilebitoi aberu naebaŋaana; Ajimat, mam ejeni adis da.

¹⁴Iboie ŋesi okek loka etogoke, Oicoloŋ kaiboisio nuiceleleete nukore.

¹⁵Anyaraun ŋul luitorete, Luelosete orotinikec.

¹⁶Ebe, “Ŋol lojimat, komanu lailo.” Etemari da ŋesi ŋol lomam acoa atiar,

¹⁷ “Elilim akipi nukokoan, Ejijim da atap naenyamio kaiyeiyea.”

¹⁸Konye mam ŋol ejeni ebe ejaas nen lukatwak; Ipejokoke da ejaas kwap noi toma Okatwak.