Read Ateso Ekalimonokinan 4 Bible Online

Ekalimonokinan 4 - Ateso bible

Ekalimonokinan 4

¹Kasodi bobo kaany aimwaŋ kere naiswama kokwap kakoloŋ: ido koany, akiyo nuka ŋul kalukemwanitai, kwabo emameete luitalakarete kes; kojai da apedor neejaas luemwanito kes, konye komameete luitalakarete kes.

² Ŋes keturio lukatwak luadaut atwakare aitelekarit luejarete lueroko ejarete.

³ Eebo, kaomoom aitelekarit kere ŋin yeneroko ejauna, yenimam ber eanyunit aswamisio nukaronok nuiswamas kokwap kakoloŋ.

⁴Kasodi aanyun aitaaritoi kere ka ŋiniswam kere nakapirianut, kanuka ŋun ŋes ikokotikinio etuŋanan ekeidunyet. Ŋun da eraas aamameak ka ainyam ekwam.

⁵ Ilokonyikini ebaŋ akekanin, kosodi ainyam akekuan elopet.

⁶Amukunet adiopet naka akan kaiyamakina itelekarit amukuneta aarei kaitaaritoi ka ainyam ekwam.

⁷Kasodi bobo kaany aamameak kokwap kakoloŋ.

⁸ Kojai obonipe, komamei lokiareit; eebo, emamei ŋes ikoku karaida onace; konye aitaaritoike kere mam enaŋi, akekonye da mam imonikinos abar, Aso ebala ebe, “Etaarikini iŋai, emiki da ekatau ajokis kanuka ŋai?” Ŋun da aamameak, eebo, aitaaritoi naepol.

⁹Itelekarito iarei ediopet; naarai ejaas keropit loejok kanuka aitaaritoikec.

¹⁰Naarai arai kibiroros, itonyouni ediopet aupake; konye itukwi ŋin yenejai bon naibiroror, yenemamei aupake loitonyouni.

¹¹Bobo da, arai eperete iarei nepepe, ibusubusakinete: konye obonipe epedori biai aibusubusakin?

¹²Arai da itelekari etuŋanan obonipe, ipikorete ŋes iarei; auno da naicipitai kauni mam eŋeda atipet.

¹³Ekatumunan lokican lokacoa itelekarit ekabaka loemoionit kobaŋaana, lomam ecamuni bobo alimokinio.

¹⁴Naarai toma aenis ŋes kelomunia araun ekabaka; eebo, keurio kerai lokican kajakanutuke.

¹⁵Abu kaany lukajarak kere luilatos kokwap kakoloŋ, kojaas nepepe kekatumunan, lokiareit, loabwoi kaiboisike.

¹⁶Emamei neesanakinete ituŋa kere, ŋul kere luirumit ŋesi: konye ŋul luetupanakinete mam isiyalamikinete ŋes. Abeit ŋun da eraas aamameak ka ainyam ekwam.