Read Ateso Ekalimonokinan 8 Bible Online

Ekalimonokinan 8 - Ateso bible

Ekalimonokinan 8

¹Iŋai loesubit bala lokacoa? Ido iŋai ejeni aitejenun akiro? Acoa naka etuŋanan itacauni akekonyen, Itegelikini da agogoŋ naka akekonyen.

² Kainakinit akirot ebe, Koricenenei aicorakinet naka ekabaka, ido kiswama ŋun kwaŋin kanuka aiyaposit naka Edeke.

³Sirisunyanari anyoun kaneejai; siridonit akirot naerono: naarai iswamai ŋesi nuekoto kere.

⁴ Naarai akirot naka ekabaka ejai apedor: iŋai da epedori atemar ŋes atiar, “Iswamai inyo?”

⁵Ŋin yenericenenei aicorakinet mam ejenuni akirot naerono; emisiikini etau loka etuŋanan lokacoa apak ka etube:

⁶ Naarai ŋinikirot ejai apakike ka etube; naarai elanirikinito noi etuŋanan icano

⁷ Naarai mam ejeni nuejaunos; naarai iŋai bo epedori alimokin ŋes kwape eiaunotor?

⁸ Emamei etuŋanan loejai apedor komoyo aitikokin emoyo; kwabo emamei ŋes apedor kapaaran naka atwanare; emamei atwario kojie, aronis da mam eyuuni ŋol loanaiki.

⁹ Ŋun kere abu kaany, abu kebwaik ekatau toma ŋiniswam naiswamao kokwap kakoloŋ; naeyaitor etuŋanan ediopet loce aiswamakin ŋes aronis.

¹⁰Kasodi bobo kaany lukaronok enukio, kolomanarete kolomununete da aibois nakalaunan, aponi kituroi kotoma ore kama kiswamaata akiro ŋun: ŋun da eraas aamameak.

¹¹ Naarai etube Ioetubokinio aswamisioit naerono mam itodolikinio katipet, ŋes etininikiata odwe luka ituŋa itauonokec aiswamaenen aronis.

¹² Karaida iswamaenenei ekadiakanaran aronis aatenak akwatat, kosodi kobut noi, konye ajeni abeit ejaunos ejok ŋul lueyoŋito Edeke, lueyoŋito kakonyeneke.

¹³Konye mam lokaronon ejaun ejok, kwabo mam ebusi apaarasia nuipu nuesubito bala etoribe; naarai mam eyoŋit kakonyen nuka Edeke.

¹⁴ Ejaas aamameak nuiswamas kakwap; ejaas ikadolitok luedoikinete kwape ejaar aswam naka ikaronok; bobo da, ejaas ikaronok luedoikinete kwape ejaar aswam naka ikadolitok: kabala ebe, ŋun da eraas aamameak.

¹⁵ Kasodi aiturit ikososio, naarai emamei etuŋanan ibore yenitelekarit ajokis kokwap kakoloŋ, dimarai ainyam, ka aimat, ka alakanar: naarai ŋun ejaunos kaŋes kotoma aitaaritoike apaarasia kere nuka aijarake, nuabu Edeke kijaik ŋes kokwap kakoloŋ.

¹⁶Naebwaikinia ekatau aijen acoa, aanyun da aswamisio nuiswamao kakwap: (naarai ejai lomam iiri ajo kakonyeke paaran ka kuare da:)

¹⁷ kasodi kaany aswam kere naka Edeke, mam epedori etuŋanan aŋicun aswam naiswamao kokwap kakoloŋ: naarai etuŋanan arai itaaritoi biai amoot, konye mam enicuni; eebo, karaida eomit lokacoa ajenun, konye mam epedori aŋicun.