Read Ateso Ekalimonokinan 9 Bible Online

Ekalimonokinan 9 - Ateso bible

Ekalimonokinan 9

¹ Naarai abu kebwaik ŋun kere toma otauka, airot ŋun kere; kwape ejaatar ikadolitok, ka lukacoa, ka aswamisiokec toma akan naka Edeke; arai amin arai alaio, mam etuŋanan ejeni; ejaas kere kakonyenekec.

² Eriakas akiro kere nuedoikinete kere: ejai adiopekirot neejaas ikadolitok ka ikaronok; neejaas luejok ka lueroko, ka luelaete ka lumam elaete da; neejai ŋol Ioeinakini asubanit, ka lomam einakini asubanit; kwape ejaar loejok, ikoni nen ekadiakanaran da; ka ŋol loiyapoi, bala loeyoŋit aiyaposit.

³Erai ŋin aronis naejai toma nuiswamao kere kokwap kakoloŋ, ebe, edoikini adiopekirot kere: eebo, bobo da, ileleba aronis toma otauon luka odwe luka ituŋa, ikerep da ejaas otauonokec eriŋa ejarete, ido kokau kaŋun elosete okatwak.

⁴Naarai ejai amun ŋol loimorikikina kalukajarak kere: naarai ejok ekiŋok loejari itia eŋatuny loetwanit.

⁵ Naarai ejenete lukajarak ebe etwakete: konye mam ikatwak ejenete ibore, mam bobo edumunete eropit; naarai imurwokinio aiitunetekec.

⁶Aolio kwana aminakec ka elaitikec ka ekokotekec da; mam bobo ejaas kakorakinet apaarasia kere kakiro kere nueswamao kokwap kakoloŋ.

⁷ Ape do, konyamenenei ikoninyamat kaiyalama, komasenenei ebinokon ketau loelakara; naarai adau Edeke acamun aswamisiokon.

⁸Kokwaŋuut inapenekon apaarasia kere; siriemamuunun akinyet kakoukon.

⁹ Kiboienenei kaiyalama kaberu naimina apaarasia kere nuka aijarakon naatai, nakiinakinit ŋesi jo kokwap kakoloŋ, apaarasiakon kere nuutai: naarai ŋin ŋes akorakinetekon kaijar, kakoniitaaritoi naitaaritor kokwap kakoloŋ.

¹⁰Ŋin kere yenedumuni akonikan aswam, kiswamaenenei kakonigogon; naarai emamei aswam, karaida ainerun, karaida aijen, karaida acoa, kokatwak, kama ilosi.

¹¹ Abu kabon, kaany kokwap kakoloŋ ebe, abolobol mam erai naka luetiroko, karaida ejie loka ikagogoŋok, karaida inyamat luka lukacoa, karaida abar naka ituŋa lukaijen, karaida asianut naka ituŋa luepiriaka; konye edoikini kes kere apak ka arereŋ.

¹² Naarai mam etuŋanan ejeni akepak; kwape lukecor luikamunio koboi loerono, kwape da akweny nuipokete karuja, kwape kwaŋin da ipokiata ituŋa kapak nakaronis, naenesaria kes atipet.

¹³Ido abu kaany acoa kokwap kakoloŋ naikoni ne, esubit bala epol kamakaŋ:

¹⁴ Kojai ere loedit, ikidioko da ituŋa luajaas toma; kobu ekabaka lokapolon aitiji, kirigau, koduk itutio luepolok:

¹⁵kojai do etuŋanan lokican lokacoa ore ŋol, abu ŋol koyu ere kanuka acoake; konye komamei yeneitunit etuŋanan ŋol lokican.

¹⁶ Kasodi kabala ebe, Ejok acoa itia agogoŋ: konye emenitai acoa naka etuŋanan lokican, komam akiroke epupunio.

¹⁷ Akiro nuinerasi lukacoa kaiyamakina epupunio aitelekarit ecelet loka ŋol kaloeyait ibaŋiok.

¹⁸ Ejok acoa itia lujiis: konye ekadiakanaran ediopet emudiari nuejok nuipu.