Read Ateso Ekosio 4 Bible Online

Ekosio 4 - Ateso bible

Ekosio 4

¹ Koany, itemelel, naminataka; koany, itemelel; Ijaas kakonye nuka ajele kotoma aimukisikon: Esubito itimakon bala esipan loka akinei Nueperete neejululue moru Gilead.

² Esubito ikelakon bala esipan loka amerekekin nuetubio ajul Nuepote kailosio; ŋinidiopet kakesi imuunit imwatok. Komamei kakesi naetwaniarit.

³Esubit aitukukon bala eusi Lokareŋan, Itemelel da akoniituk: Esubit ereetekon bala atutubet naka ekamamaga Kotoma aimukisikon.

⁴ Esubit ekonimurisiŋ bala etogo loeoja loka Daudi Lokedukitoi aiŋadanakin lujiis, Loekajakinitai iupalia elukumit, Ibukui kere luka lukirigin.

⁵ Esubito ikisinakon luarei bala ikalei iarei lumwatok luka amori, Luedakas neejaas apecelun.

⁶Aitodol naeriripio apaaran, ilicaros itolimo, Alosi oroŋat loka emina, Oukot da loka lukisupurununo.

⁷ Itemelel cut, naminataka; Emamei akemer kotomakon.

⁸ Bia kauparos anyoun koLebanon, ateranika, Kauparos anyoun koLebanon: Kosesen kaidi naka Amana, Kaidi naka Senir ka Kerumon, Kabuai nuka iŋatunyo, Koroŋan luka irisai.

⁹ Inomo ekatau, inacika, ateranika; Inomo ekatau kanoliar naka akonyekon. Kerikot ediopet lokomurisinikon.

¹⁰Ejok ca ma aminakon, inacika, ateranika! Itelekarit ca ma aminakon ebino! Aures da naka akinyetakon itelekarito ca luesaete Lukiponesio kere lukaures naejok.

¹¹ Aitukukon, wu ateranika, eisi kwape kakape nuka ao: Esik ka akile ejaas kwap kanajepekon; Aures da naka inapenekon esubit bala aures naka Lebanon.

¹² Inacika, ateranika, ŋes emanikor loebwaitai; Akoŋu naka akipi nairwasitai, atan naipucuc.

¹³Alibetakon kes emanikor loka akamamagan, loejai araito nuka akais nuipu; Koper, ka iraan lukesai.

¹⁴Lukesai ka saparon, Akalamus ka akinomon, ka ikito kere lukisupurununo; Emina ka icicikwa, ka lueuru ma kere luitelekarito ajokis.

¹⁵ Irai ijo atan naka imanikoria, Ecoa loka akipi nukajarak, Ido aguuruto nueleleete anyoun koLebanon.

¹⁶ Kokweny, ijo ekwam loka agolitomei, Kobia da, Ijo loka eŋalakimak; Kokutak omanikorika, kokut auresike. Kolom lominataka omanikorike, Konyam akeraito nuka akais nuipu.