Read Ateso Isaia 13 Bible Online

Isaia 13 - Ateso bible

Isaia 13

¹Abwokon naka Babulon nakeanyuni Isaia okoku loka Amos.

² Kosipokis emedera koroŋat lolarion, Kikeseutu eporoto, kokwetut kakan, Kolomasi kesi korutei luka lukapolok.

³ Ecoraki itiakunaka, Eebo, kanyarau ikatuŋa lukirigin kanuka akanyunyura, Kes lukaŋ luibwoŋas kaiturit.

⁴Ecelet loka ekodet koroŋan, kwape ateker naepol! Ecelet loka aumeno naka ajakanuto nuka atekerin nuetukonokinos! Inotuni EJAKAIT loka ajoresio ajore ejie.

⁵Epote kakwap naelwana, Kosaŋe da loka akuj, EJAKAIT ka lujiisike lukaisiopoke, Amudiar akwap kere.

⁶ Kibwololoto; naarai eapie apaaran naka EJAKAIT; Ebuni kwape kamudiar naebuni kama ejai Lokapedor kere.

⁷Ŋes ilakajanarotor akanin kere, Ipirisiar etau loka ŋinituŋanan.

⁸Eburuunete. Ikamuni kes ariebo ka aiturur; Eriebasi kwape aberu naidouni. Enolianakinos kaumokinit; Esaranete akecekonyen.

⁹ Koany, ebuni apaaran naka EJAKAIT kadedeŋ, Kanyunyura, ka aisiop naepol; Aitaraunia akwap naiswapit, Amudiar da ikadiakanarakake kotomakeŋ.

¹⁰ Naarai mam ecaunete aacer nuka akuj ka atukonokec aicakec: Itumutonorio akelon elomuni, Mam elap da ecauni akeica.

¹¹Eticani eoŋ akwap kanuka aronisike, Ka lukaronok kanuka numam adolitekec: Etapalauni aiwoŋonut naka luiturokina, Etisili da aisosolonut naka luitasuroko.

¹²Etarauni ituŋanan yeneciciŋ aitelekarit esabu loejok, Ituŋa luecicin aitelekarit esabu loejok loka Opir.

¹³ Kanuka ŋun ŋes etamarania akuj, Ŋanijanio da akwap anyoun kaiboisike, Kotoma anyunyura naka EJAKAIT loka ajoresio, Kapaaran da naka akeisiop naepol.

¹⁴Kosodi kanen, kwape amori naemeiao, Ido kwape kamerekekin nuemamei yenetukonokini, Ibelokinos ŋinituŋanan aboŋun otunake, Ekerete kesi ŋinituŋanan bukec.

¹⁵Icumio ŋin yenetakanuni; Eari ekileŋ ŋinidiopet yenekamunio.

¹⁶ Idecidecio imukerunukec kakonyenekec; Eŋasio itogoikec, ebuorio akeceŋor aiteper.

¹⁷ Koany, esidiki eoŋ Imedin asurokin kes, Lumam ibwaikinito itauonokec toma opuesa, Mam isiyalamikinito da esabu.

¹⁸Ebilibilete akabwaikec ikatumunak; Mam itimete aur naka akoik; Mam akecekonye itimete idwe.

¹⁹ Babulon da, aibuses naka ajakanuto, Ajokis naka aiwoŋonut naka Ikaludean, Eraun kwape Sodom ka Gomora Nakemudiaria Edeke kes.

²⁰ Mam bobo ituŋanan iboienenei kotoma, Kwabo mam iboienenei anyoun katurio kiton aturio: Mam Eyarabut idukuri ŋina; Mam bobo da ikecokok ituuriakete isipaninikec kaŋina.

²¹ Konye eperenenete itiaŋ lukadedeŋak luka amodiŋ kaŋina; Ilelebunos ikecetogoi itiaŋ luirurumaete; Iboienenete ikuului kaŋina, Etacete da ikorwa kaŋina.

²²Egatasi ipeen da kotogoikec luibwaitai, Ikuwei da kotogoikec luisiyalamikinete: Eapie akepak abunore, Mam akepaarasia iyatakinos.