Read Ateso Isaia 16 Bible Online

Isaia 16 - Ateso bible

Isaia 16

¹ Kiiukakisi yesi ekayaiton loka akwap idwe luka imerekekin Anyoun koSela loitei amodiŋ, Kiton moru loka akoku naka Sion.

² Naarai kwape akweny nueturiatos, Kwape isiarisiarunotor kotoma akaisikec, Ikote nen adwe nuka Moab Kodoketa luka Arunon.

³Kopet akiro, kitodol etube; Kituput etoribekon kwape loka akuar kidiŋ paaran: Kitonop luereŋearitai; Siribeliana kama ejai yenipasitoi.

⁴Konupak lukaŋ luereŋearitai aiboienen kajo; Moab da, korau ijo aigalisitike kakonyen nuka ekaŋatan: Naarai eoliori ekamwaŋan, Enaŋi aiŋat, Emudiaros ikepudak kakwap.

⁵ Iticasio eicoloŋ loka ajakanut kaitim, Iboikin ediopet kabeit kowema loka Daudi; Etubonokini, emoi etube, Isunyit aswam adolit.

⁶ Kipupu eitur loka Moab, ebe eturokin noi; Aiwononutuke, eiturike, ka anyunyurake da; Erai ailabilabake naatai.

⁷ Kanuka ŋun ibwololoi Moab kanuka Moab, Ibwololoi ŋinituŋanan kere: Imonyete yesi imugatin luka emusabibu luka Kir-kareset, Kinomitai noi.

⁸Akalanyakata imanikoria luka Kesibon, Ka emusabibu loka Sibima; Apotu ijaka luka atekerin kobilibilata iraanake luetelekarito kajokis; Kodoloto Yaser, eturiatos kamodiŋ; Apesito atenunake, kilamaros kaŋolol.

⁹Kanuka ŋun kimori eoŋ aimony akiyo kaimony naka Yaser Emusabibu loka Sibima: Ecocoi jo kakiyoka, Wu Kesibon, ka Eleale: Naarai kedolok eibwoŋ loka ejie araitokon ka aisakakon.

¹⁰Elemaritai aiyalama, ka ailel komanikor loideŋeriat; Emameun ayoore komanikoria luka emusabibu, Karaida ekare loka aiyalama: Emameun yenicakacakai imusabibun kaeuesia; Esililiŋ eoŋ eibwoŋ loka aisak.

¹¹Ŋes eruor ekatau kwape kadeudeu kanuka Moab, Atutubetaka nukotoma da kanuka Kir-keres.

¹² Kosodi kanen, nakitodiaror Moab, kopasak aibois naicelelei, kobuni do aiboisike nakalaunan ailip, mam ŋes ipikori.

¹³Ŋin ŋes akirot naabu EJAKAIT kolim kolo nuka Moab.

¹⁴ Konye kwana ener EJAKAIT ebe, “Eroko ketuboro ikar iuni, kwape ikar luka ŋol kaloiswamai eropit, kitisilio aibuses naka Moab kekodeteke kere loepol; luasalitos da luikidioko cut, komam kepodoi araut ibore cut.”