Read Ateso Isaia 17 Bible Online

Isaia 17 - Ateso bible

Isaia 17

¹ Abwokon naka Damasiko. Koany, mam bobo Damasiko eraun ere, Konye eraun ameje.

² Kesiliokoto ireria luka Aroer: Eraunos luka isipanin, lueuriakete, Komam yenitukuriani kes.

³ Iner EJAKAIT loka ajoresio ebe, Eoliori da etogo loegogoŋ koEpuraim, Eoliori da ajakanut koDamasiko, Ka luideunos koSuria; Esubete bala aibuses naka idwe luka Isirael.

⁴ Kosodi kanen kapaaran kaya, Inonari aibuses naka Yakob, Esenyi da abures naka akuanake.

⁵ Ikoni kwape naetukonokinia ekasakan akima nuebwoete. Esaki da akekan aluŋuren; Echo, ikoni kwape nairaria ituŋanan aluŋuren Kaditot naka Repaim.

⁶Inera EJAKAIT, Edeke loka Isirael ebe, Konye do ideunos luelelenio, Kwape ijaŋijaŋia eseituni araito aarei arai auni katenu naisididiara, Aoŋon arai akany kateŋuna nuelaanakina nuka ekitoi loideŋeriat.

⁷ Kapaaran kaya eseseni etuŋanan Lokasubanike, iteete akekonye Lokalaunan loka Isirael.

⁸Mam eseseni itemwan, aswamisio nuka akaninike, mam da itei ŋin naeswamato ibokoroke, karaida Aserim, karaida aputosia nuka akoloŋ.

⁹Kapaaran kaya ikote ireriake luegogoŋ kwape aiboisio nuesiliok kamonieik ido kaidi naka eroŋat, nuesiliok kakonyen nuka idwe luka Isirael: eraun asilio.

¹⁰ Naarai kimurwok Edeke loka aitajariokon, Kwabo mam iitunit Atiiba naka agogoŋukon; Kanuka ŋun irai iraan luitojokitai, Irai da lutubuŋuno lumo:

¹¹Kapaaran nairaia ijo ibwauni, Tupuruc da isilibuni ekonikinyomit; Konye ilicar aisak, Kapaaran naka akadakin ka aburunit naepol.

¹²Wu okwe, aiumuumo naka ituŋa luipu, Luirurumaete kwape airuruma naka aŋololin; Akalele naka atekerin nueleleete kwape alel naka akipi nuegogoŋ!

¹³Eleleete atekerin kwape alel naka akipi nuipu: Konye iretakini ŋesi kes isidisidiaros, Erukitere kwape agugu nuka iroŋan kakonyen nuka ekwam, Ido kwape apua naiyeniyenitoi kakonyen nuka etapipirio.

¹⁴ Atiboŋ, koany, etasuro; Koriŋa iwalara, emameete, Ŋin ŋes akorakinetekec lukiŋasete oni, Naebeit ŋul lukiruruete oni.