Read Ateso Isaia 23 Bible Online

Isaia 23 - Ateso bible

Isaia 23

¹ Abwokon naka Turo. Kibwololoto, yes ameerin nuka Tarusis; Naarai eswap, ŋes emamea etogo, emamea neelomaret. Epukoritai kakwap naka Kitim.

²Kililiŋata, yes luiboiete kapujan; Yes luapotu ikagwelanarak luka Sidon, Luekwananaros kaŋolol, kisilelebata.

³ Kakipi nuipu, ikinyom luka Sikor, Aisak naka Nile, ŋes esoloke; Kerai ŋesi agwelanaret naka atekerin.

⁴Kiruma jo ileic, wu Sidon, naarai ener aŋolol, Ere loegogoŋ loka aŋolol, ebe, “Mam eoŋ kariebit aidoun, karaida aidoun, Mam etanit ikatumunak, karaida aisa abekon.”

⁵ Naedolioto iemuto Misiri, Ekadakinete kesi iemuto luka Turo.

⁶Kotuboros koloto Tarusis; Kibwololoto, yes luiboiete kapujan.

⁷ Erai teni lo erekus lokeicur, Lomojoŋ ageun kolo kasonya, Loatapit akejeke ayaŋanar ŋes Aiboioror kama elwana?

⁸ Iŋai bo alosikinit ŋun koTuro, Ekakoran abokoi, Ikagwelanarakake eraas ikapolok, Luisieeanarete da eraas isotia luka akwap?

⁹EJAKAIT loka ajoresio ŋes alosikinit, Aitisilior aiwoŋonut naka aibuses kere, Aisimen isotia kere luka akwap.

¹⁰Kilapar akwapukon kwape Nile, Ijo akoku naka Tarusis; Emamei bobo aitikokinet.

¹¹Abu ŋesi kikeu akekan aŋolol, Kijaŋijaŋ ajakanuto: Ecoraki EJAKAIT nuka Kanaan Amudiar aiboisioke nuegogoŋ.

¹² Kotema atiar: “Mam bobo ileli, ijo akoku nabekot naemwanitai naka Sidon: Konyou, kotubor Kitim; ŋina da mam ibworari.”

¹³ Koany, akwap naka Ikaludean; ateker na mam bobo ejai; ainakis Iyasurian araun naka Itiaŋ luka amodiŋ: kosipokis itutiokec, kotiyakis itogoikec lukapolok; kitaraut amejei.

¹⁴ Kibwololoto, yes ameerin nuka Tarusis; Naarai eswap aiboisikon naegogoŋ.

¹⁵Kosodi kanen, kapaaran kaŋin, imurwokinio Turo ikar akaisakanykaarei, kwape ejaatar apaarasia nuka ekabaka ediopet: akaulo naka ikar akaisakanykaarei ikwaikini Turo kwape ejaar ekosio loka naadote ebe:

¹⁶“Kirum adeudeu, kirimirim ere, Ijo naadote naimurwokinitai; Koram ejok, koye ikososio luipu, Tetere kiitunio.”

¹⁷ Kosodi kanen akaulo naka ikar akaisakanykaarei eanyanari EJAKAIT Turo, eboŋori ŋesi oropitike, iteeloi ajakanuto kere nuka akwap kere.

¹⁸ Eraunos lugwelanake ka eropitike lukalaunak kama ejai EJAKAIT: mam kinadakinio karaida aidiasio; naarai eraunos lugwelanake luka ŋul kaluiboienenete kakonyen nuka EJAKAIT, ainyam luedaunete, ainap da luibusak.