Read Ateso Isaia 24 Bible Online

Isaia 24 - Ateso bible

Isaia 24

¹Koany, ikokoori EJAKAIT akwap, itwasapi, ebuburiari, Itisiarikini da luiboiete kotoma.

² Ido ikote nen, kwape ejauniata ituŋa, ikoni nen esasedoti da; Kwape ejaunia ebulesit, ikoni nen ejakaitike da; Kwape ejaunia akejaanakinan, ikoni nen ajakaitike da; Kwape ejaunia ekagwelunan, ikoni nen ekagwelaran da; Kwape ejaunia ekayuunan, ikoni nen eyuuna da; Kwape ejaunia ekejaikinan kanuka ameda, ikoni nen ekejaaran kanuka ameda da.

³Itisilio akwap lio, eŋatario da cut; Naarai ener EJAKAIT akirot ŋin.

⁴Ibworos alup eoliorete da, Ekalanyanar akwap eoliori da, Ekalanyakaros lukapolok luka akwap.

⁵ Emunar da akwap kama ejaas luiboiete kotoma; Naarai abilata ikisila, elocokis aicorakinet, Abilata aitutuket namam edaun.

⁶ Kanuka ŋun apia ekenit akwap, Egwaunitos luiboiete kotoma akirot: Kanuka ŋun ameo akim luiboiete kotoma akwap, Asalata ituŋa luikidioko.

⁷Ibworoi ebino lowinyiwiny, Ekalanyanar emusabibu, Idinyasi luelakara kotauon kere.

⁸Inonoor ailel naka isiman, Ililiŋi ecelet loka ŋul kaluibwonas, Edaun aiyalama naka adeudeu.

⁹Mam emasete ebino kikosiete; Edwarikinete nuitemerete ŋul luemasete.

¹⁰Etiyakin ere loka ainyalinyal: Egolol ŋolitogo kinyek ituŋanan alomar.

¹¹Ejai aimony korotin kanuka ebino; Itumutonorio ailel kere, Ilicar akiena kere naka akwap.

¹²Esali asilio bon kore, Inomonomoo ekek ka amudiar.

¹³Naarai ikoni nen kokidiŋ kakwap mama ejaas ituŋa, Kwape ijaŋijaŋia eseituni, Kwape nuelelenio nuka emusabibu kedaun aisak.

¹⁴Ikearete ŋul ikeceporotoi, ibwoŋas; Iworooete ejaas aŋolol kanuka apolou naka EJAKAIT.

¹⁵ Aso kitopolosi yesi EJAKAIT kokide, Ekiror loka EJAKAIT, Edeke loka Isirael, Kapujana nuka aŋolol.

¹⁶ Kipou kapuput ikososio luapote kosaŋeta luka akwap, Aibuses mama ejaas ikadolitok Konye kabala ebe, “Edokororiari, Edokororiari, itukwi eonl Eswamaca ikamodak nukamodomod; Eebo, eswamata ikamodak nukamodomod cut.”

¹⁷ Akurian, ka aipany, ka atacit ejaas mamakon, Ijo loiboie kakwap.

¹⁸ Kosodi kanen, ŋol loekeri ecelet loka akurian ibirokin aipany; Ŋol da loelomuni kokidiŋ kaipany ipoki atacit; Naarai enaaritai apedon nukokuju, Iiaŋiiaŋas apeteta nuka akwap.

¹⁹ Ebilil akwap mweny, Ebaunit akwap demedem, Ijaŋijaŋa akwap noi.

²⁰Igetanar akwap kwape ekameran, Ijaŋijaŋa epuai kepuai kwape eidukuru; Elanirikini ŋes aijerukanutuke, Ibirori, mam bobo enyouni.

²¹ Kosodi kanen kapaaran kaŋin iticani EJAKAIT ajore naka lukapolok lukokuju, Ikabakan da luka akwap kakwap.

²²Etukonokinio kes, kwape etukonokinere ienan kaipany, Egolokinio kaidaris, Akaulo naka apaarasia nuipu, iticanio.

²³ Kosodi konyet elap aitirir, Kiruma akoloŋ ileic; Naarai irumi EJAKAIT loka ajoresio komoru Sion, ka Yerusalem, Ejaun da aibuses kakonyen nuka imakioke.