Read Ateso Isaia 26 Bible Online

Isaia 26 - Ateso bible

Isaia 26

¹Kapaaran kaya eyeio ekosio lo kakwap naka Yuda ebe: “Ejai oni ere loegogoŋ; Ibwaikini ŋesi aitajario araun arwatatin ka aigalioreta.

² Koŋaasi yesi irutei, Tetere ateker naedolit naericit abeit elomari.

³Iricenenei ijo kainapakin ainapakin, Etau Ioegonakina mamakon: Naarai kimunonena jo.

⁴Komunonenas yesi EJAKAIT ikar kere: Naarai erai EJAKAIT YAWE atiiba namam edaun.

⁵Naarai abu ŋesi kitisil ŋul luiboiete kokuju, ere loicelelei: Etisil, etisil kiton alup; Etodol apua.

⁶Ipudapudai akeju; Akeje nuka lukican, Alosito nuka luilwaritos.”

⁷ Iiyaiyakina erot loka ikadolitok: Iiyaiyakini ijo erot loka ikadolitok.

⁸ Eebo, kipou kedarito jo, wu EJAKAIT, Korot loka itubesiakon; Imielas ikositauon ekonikiror ka aiitunetekon.

⁹ Kemiela jo kekatau kuare; Eebo, edunyakinit ekamoyo loejai kotomaka amoot jo; Naarai arai ejaas ikonitubesia kakwap, Isisiaunete luiboiete kakwap adolit.

¹⁰ Karaida kitodikin yenikaronon asianut, Mam cut isisiauni adolit; Kakwap naka atenit iswamai nukaronok, Eŋeri asesen apolou naka EJAKAIT.

¹¹ Wu EJAKAIT, ikiara akonikan, Konye mam kes eanyunito: Konye eanyunete adunyanutukon mama ejaas ituŋa, irumete ileic; Eebo, idopori akim lukasurupokon.

¹²EJAKAIT, icorakini ijo ainapakin mamakosi: Naarai kiswamak da akosiswamisio kere.

¹³ Wu EJAKAIT Ekosideke, Apotu iceiaka koyaito sio netikiyaitor ijo bon; Konye kanukon bon ŋes kilimoria ekonikiror.

¹⁴Atwaka kesi, mam ejarete; Aoliosi, mam ejarunete: Kanuka ŋun ibu koanyana kes komudia kes, Komwat aiitunetekec kere.

¹⁵Ibu kiyatak ateker, wu EJAKAIT, Ibu kiyatak ateker: kitopoloor: Italalaa iikorun kere luka akwap.

¹⁶ EJAKAIT, naajaatar ocan apotu komootos jo, Kobukosi ailip nakilecoria ijo kes.

¹⁷Kwape aberu naepotiei, Nacapiaria apakike naka aidoun, Erieba emonyi karieboke; Kikoni isio nen kakonyenekon, wu EJAKAIT.

¹⁸ Kipou kapotuut, kariebas, Kasubito bala kipou kedout ekwam; Mam kiswamat adiokiyuun kakwap; Mam luiboiete kakwap edoo.

¹⁹ Ejarete lukatwakakon; enyounete awatekec nukatwak. Kokwenyutu, koyooto, yes luiboiete kapua! Naarai akopyokon esubito bala akopyo nuka aica, Elekunete alup lukatwak.

²⁰ Kopotu, ikatuŋa, kolomasi agolaikus, Kogolokis ikiriginikus: Koŋopata nediokasilon, Aitodol naetuboror anyunyura.

²¹ Naarai, koany, elomuni EJAKAIT kaiboisike Aitepesen luiboiete kakwap numam adolitekec: Ikuiunete alup da akeceokot, Mam bobo eraparete lukatwakakec.