Read Ateso Isaia 29 Bible Online

Isaia 29 - Ateso bible

Isaia 29

¹Itukwi ijo Ariel, Ariel, Ere loedukuri Daudi! Kotukokisi ekaru mama ejai ekaru; Kodolonenete ipucin:

²Kasodi eoŋ aitakadikin Ariel, Ejauni aibworo ka akuudian: Eraun ŋesi mamakaŋ kwape Ariel.

³Edukuri eoŋ asurokin jo, Erigauni jo kabwas, Etutuei itutio asurokinia jo.

⁴ Kitisilio jo, inera kalup, Elorŋunete akonikiro kokwap kaneejai apua; Eraun ekoniporoto kwape loka yenejai ajokit, ebuni kokwap, Iyeiyeas akonikiro epote kapua.

⁵Konye esubi aipues naka lukasurupokon kwape apua naidupukuk, Aipues da naka luetasuro kwape agugu nuekutari. Eebo, enesuni atipet ŋipeŋin.

⁶Eanyanari EJAKAIT loka ajoresio ŋes kairetun, Ka amaran naka akwap, ka ecelet loepol, Ka etapipirio ka ekwam, Kairian naka akim naidopori.

⁷Ido aipues naka atekerin kere nuinuete Ariel, Kes kere nuitijiete ŋes ka akeibois naegogoŋ, Nukitakadikinete ŋes eraunos kwape airujasit, Aitapoet naka akuare.

⁸Ido esubi kwape nairuiaa etuŋanan loeriebi eteŋei, Ido koany, enyami; Konye ekwenyuni, eorori etauke; Arai kwape nairuiaa etuŋanan loejakit akur, Ido koany, emasi; Konye ekwenyuni, ido koany, iilor, eriŋa imiela: Ikote aipues naka atekerin kere nen, Nuitijiete moru Sion.

⁹Kidareutu koumokis; Komudukoto, koraut imudukiok: Komerikinos, konye mere kebino; Kigetigetas, konye mere kanuitemerete.

¹⁰ Naarai abukok EJAKAIT tomakus emoyo loka ajo nuipu, Etumudak akusikonye, kes inabin; Emuko ŋesi akwesikus, kes ikadwarak.

¹¹ Eraunos aitapoeta kere kamakus kwape akiro nuka eitabo loipucakinitai, loijaikinio etuŋanan loepedori asoman ebe, “Kosiom nu, keŋaiŋait”: kobala ebe, “Mam apedori, naarai ipucakinitai.”

¹²Ijaikinio etuŋanan lomam epedori asoman eitabo ebe, “Kosiom nu, keŋaiŋait”: kobala ebe, “Mam apedori asoman.”

¹³ Kobala EJAKAIT ebe: “Naarai ikunyunete ituŋa lu mama ajai, Ketubusikinete eoŋ kaitukekec ka aŋajepakec, Konye elwaka ikecetauon kamakaŋ, Ayonitekec ŋes aicorakinet naka ituŋa naisisianakinitai:

¹⁴ Aso koany, eswamai bobo aswam nakaumokin kotuŋa kalu, Aswam naisuwumokinit, nakaumokin: Eoliori acoa naka lukacoakec, Ibwaio ajenun naka Iuberianakec.”

¹⁵ Itukwi ŋul luekotosi aibwa ainerunikec neidulokina kama ejai EJAKAIT, Ejaas akeceswamisio kamuton, Kobalas ebe, “Iŋai ca kianyuni oni? Iŋai ca da kijeni oni?”

¹⁶ Ibuburiarete akiro! Imarakinio cabo ekajean kwape elupe? Tetere ibore yenisubuna elimokini nuka ŋol lokesubi ebe, “Mam ŋes kasubit eoŋ:” Arai ibore yenijeuna elimokini nuka ŋol lokejeuni ebe, “Emamei ŋes aijen”?

¹⁷Mam tope esalit apak edit noi, Kosodi Lebanon aluor emanikor loideŋeriai, Ido emanikor loideŋeriai imarakinio araut amagoro?

¹⁸Kapaaran kaŋin epupi ekimiŋ akiro nuka eitabo, Akonye da nuka emuduki eanyunete Kotoma neeiesi ŋaŋ ka amuton.

¹⁹ Iyatanakinete da luitasonos ailelekec kotoma EJAKAIT, Lukican kotuŋa da iyalamikinete Lokalaunan loka Isirael.

²⁰ Naarai itapalaunio loketasuro, enaŋi ekamwaniton, Emudiaros ŋul kere luegiparito numam adolit.

²¹ Luisigwaunete ituŋanan akiro, Luelokete ŋol loitoroni korute, Luitapaarete ekadoliton atai.

²² Kanuka ŋun inera EJAKAIT loalakuni Aburaam, nuka ekek loka Yakob, kwanata ebe: “Mam bobo ileic irumete Yakob, Mam bobo ilocokin ejese loka akonyeneke.

²³ Konye naeanyunia idweke, Aswam naka akaninika, kokidiŋike, Italaunete ekakiror: Eebo, italaunete Lokalaunan loka Yakob, Eyoŋete Edeke loka Isirael.

²⁴ Ŋul da luepaarete komoyo edolokinete aijen, Ŋul da luirurumaete enupete aisisianakinio.”