Read Ateso Isaia 3 Bible Online

Isaia 3 - Ateso bible

Isaia 3

¹ Naarai koany, elemari EJAKAIT, EJAKAIT loka ajoresio, Agoŋis ka aiganis koYerusalem, koYuda da, Agoŋ is kere naka inyamat, Ka Agoŋis kere naka akipi;

²Etuŋanan lokirigi, ka ekajiot; Ekatubon, ka enabi, Ekadwaran ka ekimat;

³Ekapolokiton loka akaisakany, ka esoti, Ekenerunan ka ekejodijodon loepiriana, Ka emurwon loetionit.

⁴ Ainakini idwe araut ikapolokokec, Eyaete imukerun kes.

⁵ Eroikinio ituŋa, ŋinituŋanan kayeniceke, Ŋinituŋanan kiidunyeteke: Epoga ikoku kama kekimat, Epasoit da kama kesot.

⁶Naikamunia ituŋanan onaceke Kotogo loka papake, kobala ebe, “Ejai jo anapito, korau ekayaitonikosi, Koraunos amejei nu nuiyait.”

⁷Kapaaran kaŋin ikeseuni ekeporoto, kobala ebe, “Mam araun loketaŋaleunon; Naarai emameete inyamat kotogoka, karaida inapen: Mam kituluorete eoŋ ekayaiton loka ituŋa.”

⁸Naarai amudiar Yerusalem, ebiror Yuda da: Naarai aŋajepakec kaswamisiokec aluikis EJAKAIT, Aitunyunyurikin akonye nuka aibusesuke.

⁹Ejautene loka ireetakec itejenunit kes ebe itelekarito; Elimorete aronisikec kwape Sodom, mam ibwaete. Itukwi akeceijar, Naarai eswamakinos bonik aronis.

¹⁰Kolimokisi ikadolitok ebe ejaunos ejok: Naarai enyamete araito nuka aswamisiokec.

¹¹Itukwi ikaronon! ejaun erono; Naarai nueswamata akaninike, nupemm iswamakinio ŋes.

¹²Ikatuŋa, idwe ludidik eroikinete kes, Ido aŋor kes eyaitos. Wu ikatuŋa, lukiŋarenikinete yes kitapaarete, Emudiarete ekusirot loiloseneneoto.

¹³Ebwoi EJAKAIT apurokin, Ebwoi da atubokin ituŋa.

¹⁴ Etubokini EJAKAIT etube loka imakio luka iketuŋa, ka ikapolokoke ebe: “Yes ca luinyamata cut emanikor loka emusabibu, Iŋatuna luka lukican ejaas otogoikus.”

¹⁵Ebala EJAKAIT, EJAKAIT loka ajoresio ebe, “Iswamaete inyo aidecidec ikatuŋa, Airic akonye nuka lukican?”

¹⁶Bobo da abala EJAKAIT ebe: “Naarai eomiara apesur nuka Sion, Ido elosete kimurisiŋa luikiara, Ka aerit akonye, Elosete epogasi, nuituruete akecekeje.”

¹⁷Kanuka ŋun ŋes kitedekia EJAKAIT kasalab Isiaduko luka akwes nuka apesur nuka Sion, Kosodi EJAKAIT apukor ileicikec.

¹⁸Kapaaran kaŋin elemari EJAKAIT ajokis naka aonakec, ka itibine, ka apelia nuka epuesa;

¹⁹luisirio ka amwolai, ka iitabalan;

²⁰igoen luka akwes, agirai nukokuurunya, ka aeneta, ka asadukun nuka aures namaa, ka imakakin;

²¹igilun, ka igiluna lukokumes;

²²inapen luka ipucino, ka iloun, ka aimukisio, ka iriagin;

²³aroeta, ka ebaputa loejok, ka igoen lukieniena akwes, ka aiswapeta da.

²⁴Kosodi kanen, ejaun abosus itia lukesai lueuru maa; Auno itia arokoba; epata loka akou itia itima luelacitai; anapito naka epuko itia anapito naibus: amacareta itia atemelel.

²⁵Eari ekileŋ ikonituŋa, Etwakete ikiriginikon da kojie.

²⁶ Ekuudianete iruteike, ibworosi; Itisilio ŋes, iboikini kwap.