Read Ateso Isaia 31 Bible Online

Isaia 31 - Ateso bible

Isaia 31

¹ Itukwi ŋul luijesaros Misiri ainarakinic, luegonakina ibalasin; Luemunosi agalin, naarai ipu kesi, Ikebwanenok da, naarai egogoŋ kesi noi; Konye mam esesenete Lokalaunan loka Isirael, Karaida amoot EJAKAIT!

²Konye eco ŋesi da, eyauni aronis, mam inyakuni akekiro: Konye enyouni asurokin etogo loka ikeswamak aronis, Asurokin da luiŋarakinete luiswamaete numam adolit.

³ Eraas Imisirian ituŋa, mam eraas Edeke; Eraas ibalasinikec da akiriŋ, konye mam eraas emoyo. Naikiaria EJAKAIT akekan, Iguikini loinarakini, ibirori da loiŋarakinic, Ikarakinete kes kere nepepe.

⁴Naarai kabala kwanata EJAKAIT eoŋ ebe, Kwape irurumaa eŋatuny arai iŋatuny kanuka lumejanake, Arai enyaraunio ekodet loka ikecokok asurokin ŋes, Mam ekurianar kanuka iporotoikec, Karaida apodokin eceletekec: Kwape kwaŋin ijesuni EJAKAIT loka ajoresio Moru Sion ka eukotoke ejie.

⁵ Kwape akweny nuepororete, Kwaŋin da ibuakinit EJAKAIT loka ajoresio Yerusalem, Ibuakinit, eyuuni, etubori, itukuei.

⁶ Kibelokinos yesi mama ejai ŋol loipaliikinito, okwe yes idwe luka Isirael.

⁷ Naarai kapaaran kaŋin ecakarete kesi ŋinituŋanan aputosiake nuka epuesa, ka aputosiake nuka esabu, nukisubakinete akusikanin araun aronis.

⁸ Kosodi etwani Eyasuriat kanuka ekileŋ, lomere loka etuŋanan: Emudiari ŋes ekileŋ lomere loka etuŋanan; Ekeri ŋesi ekileŋ, Eraunos ikekatumunak ikeswamak nukailolitoi.

⁹ Ebala EJAKAIT loejai akimike Sion, Eupake da koYerusalem ebe: “Etubori atiibake kanuka amaran, Eburunete ikapolokoke kanuka aanyunet.”