Read Ateso Isaia 32 Bible Online

Isaia 32 - Ateso bible

Isaia 32

¹ Koany, eyai ekabaka kadolit, Eyaete lukapolok kerube.

²Ido eraun etuŋanan aŋopis kama ejai ekwam, Ka amecis akiru; Kwape ka icorin kaibois naeonit, Kwape ka etolim loka emoru loepol kakwap nakailolony.

³ Mam emusimusete akonye nuka ŋul kaluekwenyete, Iirarete da aki nuka ŋul kaluepupete.

⁴Etau da loka loemositoi ejenuni acoit, Ka aŋajep naka Iuinejiŋejas itemonokino adesiar.

⁵Ebaŋ mam bobo enyarao ekasianan, Karaida otaupe anyarao ojokotau.

⁶Naarai inera ebaŋ nukabanaanur, Eketau da iswamai numam adolit, Esubi nukainyanakin Edeke, Elimit da nueriete mama ejai EJAKAIT, Aisirieb eteŋei aijar naka yeniketeŋei, Ka aikokoor da nutikemat yenejakit akur.

⁷Ido eroko iponesio luka otaupe, Ebili ibotei lueroko amudiar yenitasono kaiŋal, Karaida inera yenilwaritoi abeit.

⁸Konye iswamai ekasianan nukasianut; Ido icasit kotoma asianut.

⁹ Konyoutu, yes aŋor nuijalijalas, kiirasi ekaporoto; Yes apesur nuibwalara, kitoikis aki akakiro.

¹⁰Yes aŋor nuibwalara, ianyunete ican apaarasia nuedeparito ekaru: Naarai emameun aide emusabibu, emameun da aisak.

¹¹Komaranata, yes aŋor nuijalijalas; Kopodokinos yes nuibwalara; Kolacasi ikusinapen, komuialalata, Konapata ipukoi kanabesikus.

¹²Edipidipete atorobusio kanuka amanat nukajokak, Kanuka emusabibu da loerait.

¹³ Ebwaŋunete ikukwa ka ikodokodo kotoma akwap naka ikatuŋa; Eebo, kotogoi kere lukaiyalama kotoma ore loiyalama.

¹⁴Naarai ebwosio rwaru kotogo lopeti: Inyeinio ere loipu ituŋa; Eukot ka aitelies eluoros abuai ikar kere, Alakara naka itukoi, erony loka isipanin;

¹⁵ Aitodol nekijesakinere oni emoyo lokokuju, Koraun amodiŋ amana naapusuk, Ka amana da naapusuk konyarai amagoro.

¹⁶ Kosodi etube aiboikin toma amodiŋ, Ejaikin da adolit mana naapusuk.

¹⁷ Eraun aswam naka adolit ainapakin; Ido eyauni adolit aiyamakina ka aicasit ikar kere.

¹⁸Iboikinos ikatuŋa aibois nakainapakina, Kotogoi da luegogoŋ, kotoma aiyeŋuneta nuiyamakina.

¹⁹ Konye etepi akak, aisibiror amagoro; Etiyakinio cut ere.

²⁰ Isirereŋitoi yes luiyeete ariri naka akipi kere, Luimearete akeje nuka emoŋ ka asigiria neebearete kere.