Read Ateso Isaia 33 Bible Online

Isaia 33 - Ateso bible

Isaia 33

¹ Itukwi, jo loimudiari, komam kimudiario: Loiswamai nukaimod, komam kes kiswamakinito jo nukaimod! Arai kidau ijo amudiar, kimudiario; Kidau aswam nukaimod, kiswamakinete kesi da jo nukaimod.

²Wu EJAKAIT, kiswamakinai sio asianut; Kipou kedareut jo: Korai ijo akanikosi [2] ŋinitupuruc, Aitajariokosi da kapak naka ican.

³Kanuka airuruma naka ecelet ekerete ituŋa; Kanuka anyounikon isiarisiarunos atekerin.

⁴Etukokinio lunatanakus kwape etukokinia ekurut: Esomakinos kwape esomanaror emaase.

⁵ Itopolooritai EJAKAIT; naarai iboienenei kokuju; Isilelebit ŋesi Sion ketube ka adolit.

⁶ Ejaun aicasit kapakiokon, Aidiles naka aitajario ka acoa, ka aijen: Ayoŋit EJAKAIT ŋes abarake.

⁷ Koany, emonyete lukiriginikec kokiŋa; Emonyete noi ikiyakia luka ainapakin akiyo.

⁸ Eswapa irotin lukapolok, enaŋi ekaloton: Abil aitutuket, amen ireria, Mam epodo ituŋanan.

⁹Ibworo akwap akalanyanar: Irumito Lebanon ileic erinyori: Eputokinos Saron kamodiŋ; Eraraaros Basan ka Karumel akuikec.

¹⁰ Ebala EJAKAIT ebe, “Kwape kwana anyouni; Kwape kwana adakun; Kwape kwana etopoloor.

¹¹Ipotiete agugu, idounete ariaŋ: Eiyeŋanekus ŋes akim nakidopori yes.

¹²Ikonakinete ituŋa bala icweikinitai araun ecoka: Bala ikukwa luejepitai, luicweio kakim.”

¹³Kiirasi, yes luilwaka, nueswamat eoŋ; Yes da luiapiete, kocamut akapedor.

¹⁴Akuriakaros ikadiakanarak luka Sion; Ekam amaran ŋul lumam eyoŋito Edeke. Iŋai bo kaoni epedori aiboienen kakim naidopori? Iŋai bo kaoni epedori aiboienen kaiewe namam edaun?

¹⁵Ŋol loelosenenei kadolit, loinerenenei nuetenete; Ŋol loemeni ameda naka aimwaŋ, Loilakilaki akekanin kinyeis aitiŋ ainakineta nuitumudakete akonye, Loisikakini akeki kinyeis aipup nuka aokot, Loitumudaki akekonye kinyeis asesen aronis;

¹⁶Iboienenei ŋol kokuju: Ejaun akeibois nanopis atiiban nuegogoŋ noi: Einakinio ikenyamat; mam akekipi eonikinete.

¹⁷Iteete rwaru akonikonye ekabaka katemeleleke: Eanyunete akwap nainyaminyamakina noi.

¹⁸ Eomoomoi ekonitau etasuro: Ali bo loimarit, ali bo loininit esolo? Ali bo da loimarit itogoi lueojak?

¹⁹ Mam ianyuni ateker naededeŋ, Ateker naka aŋajep naepagal amisiikin, Naka aŋajep naineiineia namam ipedori ajenun.

²⁰Kosesen Sion, ere loka ipueinowok lueseunitai: Eanyunete akonikonye Yerusalem aibois naiyamakina, ewema lomam elemario, Iloinoke mam eutunio cut, Karaida aunoike mam eŋedeŋedeunos.

²¹ Konye ejaenena EJAKAIT kaoni kaŋina kapolou, Aibois naka icorin luelalak ka aguuruto; Nemam ataker naejaas akinola itori, Karaida ameeri nakeiie mam etubori kanen.

²² Naarai EJAKAIT ŋes ekatuboniwok, EJAKAIT ŋes Lokesilan ikisilawok; EJAKAIT ŋes ekabakawok; kitajari ŋesi oni.

²³Ejarijarunos aunoikon; Mam apedorete aitogogoŋ akeju naka epirikec, Mam apedorete arior emedera: Kosodi ckorokoroi luŋatuna luipu luijoreunitai; Luiriadas kes eyaŋaarete luŋatuna.

²⁴ Loiboienenei kanen mam ebala ebe, “Adek eoŋ”; Ituŋa luiboienenete kanen isionio numam adolitekec.