Read Ateso Isaia 34 Bible Online

Isaia 34 - Ateso bible

Isaia 34

¹Kikunyutu, yes atekerin, kopupur; Kiirasi, yes ituŋa!. Kopuput alup ka ailelebakec; Akwap, ka iboro kere da luelorŋunere kotoma.

²Naarai enyunyurikinit EJAKAIT atekerin kere, Isiopakinit ajorekec kere: Amudia kes cut, ijaikinit kes aario.

³Ecakario luaaranakec, Enyouni abosus naka atesinakec, Ecalaros iroŋan kaokotokec.

⁴ Ebauni ajore kere naka akuj, Eŋunukio akuj kwape emukule: Eraraar ajorekec kere, kwape eraraaror akiot komusabibu, Ido kwape eraraaror akiot kotini.

⁵ Naarai amat ekakileŋ emonikin kotoma akuj; Koany, ijesuni mama ejai Edom, Oruna luka ekenitika, aitub akiro.

⁶ Imono ekileŋ loka EJAKAIT aokot, Itutumio katarion, Kaokot nuka imerekekin ludidik ka akinei, Kasiepai nuka iŋalur luka imerekekin: Naarai ejai EJAKAIT asubanit koBosura, Earit loepol kakwap naka Edom.

⁷Ijesunos ikosobwa kakes, imoŋin lutobai kimoŋin; Emerikini akwapukec aokot, itutumio apuakec katarion.

⁸Naarai ŋes apaaran naka enyaŋit loka EJAKAIT, Ekaru loka aitepesen anolopakec kaSion.

⁹Eluoros aguurutoke emina, Apuake da acukuman, Eluor akwapuke emina loenoki.

¹⁰ Mam itudeŋio kuare karaida paaran; Epurienenei apuruke ikar kere: Iswapi ameun katur kiton atur; Emameun yenetubori kanen ikar ka ikar.

¹¹Konye irumete etolut ka ecoc; Iboienenete etukuri ka ekuruk: Eriori ŋesi ekokoro loka aitirira kamake, Ebiriji da loka apalapalat.

¹²Enyarakinete isotiake ajakanut, konye emameun idiopet; Eraunos lukapolokoke kere aamameak.

¹³ Elibunete ikukwa kotogoike lukapolok, Ikodokodo ka isukukur kaiboisioke nuegogoŋ: Eraun aibois naka ikuwei, Alaro da naka ikuului.

¹⁴Iriamakinos itiaŋ luka amodiŋ kibuin; Emonyakini ekoroi aupake; Eebo, edoi akimat nakakuare nen, Edumakin aibois naka aibworar.

¹⁵Itemokini aipom ekaike kaŋina, eunei, Ebekuni, etukonokini kwap kotoribeke: Eebo, etukonokinos atoorion kaŋina, Ŋinidiopet kopadicake.

¹⁶ Komoata yesi oitabo loka EJAKAIT, kosiomata: Mam idiopet kaŋul eoliori, Emameun naeoliori opadicake: Naarai aituk naka EJAKAIT ŋes icorakinit, Ekemoyo da ŋes atukokinit kes.

¹⁷ Elamilamaki kes eroet, Akekan da ŋes akorakinit kes kokokoro: Irumete kesi ikar ka ikar, Ameun katur kiton atur iboienenete kesi kotoma.