Read Ateso Isaia 37 Bible Online

Isaia 37 - Ateso bible

Isaia 37

¹ Kosodi kanen, kepupu ekabaka Kesekia, kocil inapeneke, konap epuko, koloma togo loka EJAKAIT.

² Kijuka Eliakim, loapolokinit ekal, ka Sebuna ekewadikan, ka imakio luka isasedotin, konapitos ipukoi, mama ejai Isaia enabi okoku loka Amos.

³ Kotemasi ŋes atiar, “Inera Kesekia kwanata ebe, Apaaran na erai apaaran naka ican, naka aitoronio, ka naka amoromoroo; naarai adol idwe aurio, emamei da agogoŋ nakaidoun.

⁴ Motoko iirari EJAKAIT Ekonideke akiro nuka Rabasake, loejukuni ekabaka loka Asuria ejakaitike amoromor Edeke lokajaran, ka aitoron akiro nuapupu EJAKAIT Ekonideke: aso kitonyou ailipikon kanuka aatoŋot naedeun.”

⁵Kopotu do ikejaanakinak luka ekabaka Kesekia neejai Isaia.

⁶Kotema Isaia kes atiar, “Kolimokis ejakaitikus kwanata ebe, ‘Inera EJAKAIT kwanata ebe, Sirikiyoŋ akiro nuipup, nukamoromorooto eoŋ ikejaanakinak luka ekabaka loka Asuria.

⁷Koany, ebwaikin emoyo tomake, epupuni ŋesi eemut, eboŋori bukec; ebirokini eoŋ da ŋes kekileŋ akwapuke.’ ”

⁸ Koboŋo do Rabasake, kodum ekabaka loka Asuria ejiosi kaLibuna: naarai abu kopupunite ebe aboŋo ŋesi koLakis.

⁹Kopup inerai nuka Tiraka ekabaka loka Etiopia ebe, “Koany, alomu aitiji jo.” Kepupu ŋun, kiyakik ŋesi Kesekia ikiyakia ebe,

¹⁰“Ilimokinete Kesekia ekabaka loka Yuda kwanata ebe, ‘Kinyek Edekekon loimuno aiŋal jo ebe, Mam Yerusalem ijaikinio akan naka ekabaka loka Asuria.

¹¹Koany, ipupunit ijo nueswamakis ikabakan luka Asuria akwapin kere, amudianarete kes cut: do konyet jo kiyuunio?

¹² Apotu kereka idekesio luka atekerin koyuununete kes, nuamudianarete lukapapaaka, Gosan, ka Karan, ka Resep, ka idwe luka Eden luajaas Telasar?

¹³ Ai bo ejai ekabaka loka Kamat, ka ekabaka loka Arupad, ka ekabaka loka ere loka Separabaim, loka Kena, ka Iba da?’ ”

¹⁴Kijau Kesekia ebalua kakan naka ikiyakia, kosiom; kolot Kesekia togo loka EJAKAIT, kopesia kakonyen nuka EJAKAIT.

¹⁵Kilip Kesekia EJAKAIT, kobala ebe,

¹⁶ “Wu EJAKAIT loka ajoresio, Edeke loka Isirael, loiboie kokerubin, ijo ŋes Edeke, ijo bon, loka ajakanuto kere nuka akwap; ijo kolo isubi akuj ka akwap.

¹⁷ Kitoik akonikit, wu EJAKAIT, kiira; kokweny, wu EJAKAIT, koany; kopup akiro kere nuka Senakerib, nuejuku ŋesi amoromoroo Edeke lokajaran.

¹⁸Abeit, wu EJAKAIT, apotu ikabakan luka Asuria komudiasi atekerin kere, ka akecekwap da.

¹⁹Apotu kocakasi idekesiokec akim: naarai mam keraas idekesio, konye aswam naka akanin nuka ituŋa, ikito ka amor; ŋes kemudiarere kes.

²⁰Aso do, wu EJAKAIT Ekosideke, kitajarai sio kakanike, tetere ejenunete ajakanuto kere nuka akwap ebe, Ijo ŋes EJAKAIT, ijo ben ba.”

²¹Kosodi Isaia okoku loka Amos aijukakin Kesekia ebe, “Inera kwanata EJAKAIT, Edeke loka Isirael, ebe, Naarai ilip ijo eoŋ asurokin Senakerib ekabaka loka Asuria,

²²na ŋes akirot naener EJAKAIT mama ejai ŋesi ebe: “Kimwaŋit akoku nabekot naka Sion jo, Ekienar jo kisekelei: Emuŋumuŋ akoku naka Yerusalem akouke neijai.

²³Iŋai bo imoromor ijo, kisekel? Iŋai bo itopolooritor ijo ekoniporoto, ka aiteluor akonikonye kuju? Isurok Lokalaunan loka Isirael.

²⁴Imoromor EJAKAIT kokiyakiakon, Kinera atiar, ‘Kaipues naka agalinika Adokari oswion luka iroŋan, Atutubeta nukotoma nuka Lebanon; Ajepi iresiake lueojak, ka iberosinike luejokuka; Alomari da aiboisike naiwasie, Amagoro naka emanikorike loideŋeriat.

²⁵Abok, amat akipi, Etooni da kakakeju icorin kere luko Misiri.’

²⁶Mam ibu kopup kwape eswamaa kolo, Kasub agear apeŋo? Kwana da etodolit, Korai ijo loimudiari ireria lukebwaitai Araun aapoŋor nukamejei.

²⁷Kanuka ŋun lueboiete kotoma keraas luedit agogoŋ, Koburut, kitirirata; Kosubito bala inya luka ais, kwape ikui, Kwape kinya luejaas kuju togo, Kwape emanikor loka akima eriŋa epolooro.

²⁸Konye ajeni eoŋ akoniiboie, Alomarikon ka alomunikon, Aikerepoonutukon kaneajai.

²⁹ Kanuka aikerepoonutukon kaneajai, Ido naarai adolu emokodekon akiika, Ŋes ebwaikinia ekagolu okumesikon, Arukanaka da aitukukon, Kenyakari jo orot loilomunia.

³⁰“Na ŋes eraun aanyunet mamakon: okaru lo inyamete yenebwaŋuni bon, okaru lokiareit yenitocuni kaji; okaru lokiwuniet koyeata, kodwenya, kiraata imanikoria luka emusabibu, konyama araitoke.

³¹Edupi aatoŋot naideuni naabu koku kokek loka Yuda alias kwap, kora araito kokuju.

³² Naarai elomari aatoŋot koYerusalem, luekuete da komoru Sion: itodolikini ŋun adunyanut naka EJAKAIT loka ajoresio.

³³“Aso inera kwanata EJAKAIT nuka ekabaka loka Asuria ebe, Mam edoluni ore lo, karaida agumakin emal, karaida adolokin kebuku, karaida aitutu etut asurokinia ŋes.

³⁴Ebala EJAKAIT ebe, Orot lokelomunia, ŋopeŋol eboŋoria, ido mam edoluni ore lo.

³⁵ Naarai egaŋi eoŋ ere lo aitajar, kanukaŋ, ido kanuka ekakejaanakinan Daudi.”

³⁶ Koloma emalaika loka EJAKAIT oidukurun luka Iyasurian, kodany ilukumin akwatat ka ilukumin akaisakanykauni ka lukany: kenyout ituŋa tupuruc sek, koany, koraas kere ikatwak.

³⁷Kosodi Senakerib ekabaka loka Asuria anyoun, kolot, koboŋo, kiboikin Ninebe.

³⁸Kosodi kanen, emai ŋesi kotogo loka Nisurok ekedeke, koarata Aduram-melek ka Saresar odweke ŋes kekileŋ: kokereasi akwap naka Ararat. Kirum Esar-kadon okokuke aiboisike.