Read Ateso Isaia 40 Bible Online

Isaia 40 - Ateso bible

Isaia 40

¹Ebala Ekusideke ebe, Kitalakasi, kitalakasi ikatuŋa.

²Kinerata nukaitalakar Yerusalem, kiworokis ŋes ebe, Adaun ejieke, esionii numam adolit; Ainakin kakan naka EJAKAIT irwan aarei kanuka aronisioke kere.

³ Abu eporoto kiworoi ebe: “Kitemokisi erot loka EJAKAIT kais, Kitenasi erot loka Edekewok kamodiŋ.

⁴Itutuo rwaru niniditot, ikeio ŋolimoru ka ŋoliukot; Itenario amagulul, iiyaiyakinio nuimugogolito.

⁵ Epukorio rwaru aibuses naka EJAKAIT, Erataikinete ituŋasinei kere aanyun: Naarai ener aituk naka EJAKAIT.”

⁶ Abu eporoto kotema atiar, “Kikalal.” Kojau yene bala ebe, “Anyoika ekalalaa?” Ituŋasinei kere eraas inya, Akecejokis da eputos bala aturot naka ais:

⁷Erinyorete inya, isokokoi da aturot; Naarai ekutakini ŋes euria loka EJAKAIT: Abeit eraas ituŋa inya.

⁸Erinyorete inya, isokokoi da aturot; Konye akirot naka Edekewok eperonori ikar kere.

⁹Wu jo loilimonokini Sion akiro nukajokak, Kodoka kuju oroŋat loicelelei: Wu jo loilimonokini Yerusalem akiro nukajokak, kikalal noi; Kikalal sirikiyoŋ; Kolimok ireria luka Yuda ebe, “Koanyutu Edekekus!”

¹⁰ Koany, ebuni EJAKAIT Edeke kwape ekagogoŋon, Akekan da irumakinit ŋes; Koany, ejai aimalaeteke kaŋes, Ekeropit da ejai kakonyeneke.

¹¹ Itadaki ekesipan kwape ekecokon, Etukonokin idwe luka amerekekin akanike, Ka aidak katorobuke, Isiyapi da ŋun nuitanakete.

¹²Iŋai bo itemit akipi kotau kakanike, Itemit akuj katutubet naka ekubit, Egolorit apua naka akwap toma amot, Iniŋit iroŋan kaitemisioit, lukon da kaitiirianet?

¹³ Iŋai da itetenit emoyo loka EJAKAIT, Arai ituutorit ŋes kwape ekapetan akiroke?

¹⁴Inerunit ŋesi kaŋai, iŋai da kituutorit ŋes, Kisisianak ŋes erot loka etube, Kisisianak ŋes aijen, Kitodik ŋes erot loka ajenun?

¹⁵Koany, esubito atekerin bala aidonakinet naka akipi kamot, Imaritai kwape apua naidupukuk naejai toma aitemis: Koany edakit apujan kwape ibore yenedit noi.

¹⁶Mam Lebanon ilosikino araun akito nukinoka, Itianike da mam ilosikinos araun ainakinet naicweio.

¹⁷Esubito atekerin kere bala mam eraas ibore kakonyeneke; Imaritai kes kamakeŋ araut atai, ido aamameak.

¹⁸ Aso ituputoorete Edeke kwape kaŋai? Arai aput anyoin itiirianiata ŋes?

¹⁹Aput naegerer, ekeswaman ŋes itacalari, Ekatatan esabu ŋes iladai kesabu, Etataanakini ŋes irikoi luka epuesa.

²⁰ Ituŋanan yenikican yenimam epedori ainakin naikoni nen, Eseuni ekitoi lomam ipiri; Emouni ekeswaman loepiriana asipokin aput namam ijaŋijaŋa.

²¹ Mam ca kijeŋunito? Mam ca kiirarito? Mam kilimonokinitai kageunet? Mam kimisiikis ageun kapeteta nuka akwap?

²² Ŋopeŋol loiboie kokuju kalukunet naka akwap, Kosubito luiboiete kotoma bala ibeerei; Loepesi akuj kwape aigalisit, Eterari ŋes kwape ewema lokibois.

²³ Itapalauni ŋesi ikapolok; Itarauni ikatubok luka akwap aamameak.

²⁴Eebc, mam ber kiraitai; eebo, mam ber eyeitai; Eebo, mam ber aliasikec isiaranara kalup: Kosodi akutakin kes, erinyorete, Ekakaari etapipirio kes kwape ariaŋ.

²⁵ Ebala Lokalaunan ebe, “Aso kituputoorete eoŋ kwape kaŋai, Kasodi ariakakin kaŋes?”

²⁶ Kiteluosi akusikonye kuju, koanyutu, Iŋai bo kesubi ŋun? Loitolomuni ajorekec kimarite: Emaanakini kes kere ikiroria; Kanuka apolou naka apedorike, Ido naarai egogoŋ ŋesi katitiŋ, Mam adiopet eoliori.

²⁷Kanukinyo ibalar ijo, wu Yakob, Inera, wu Isirael, ebe, “Ibwaitai ekarot kinye EJAKAIT aanyun, Atubor atubokinioka kama ejai Ekadeke”?

²⁸ Mam ca ijenunit? Mam ca iirarit? EJAKAIT ŋes Edeke lomam edaun, Lokasuban isaŋeta luka akwap. Mam iilori, karaida aipas; Mam epedorio amisiikin ajenunike.

²⁹Einakini luiiloros ati tiŋ; Iyatakini da agogoŋ ŋin yenemamei apedor.

³⁰Karaida iiloros isap, epasete, Ibiroros ikatumunak kanuka ailolony:

³¹ Konye ŋul luidareunete EJAKAIT iteteunete akecegogoŋ; Eterarete abebenoka kwape imorukaalen; Ekerete, komam epasete; Elosete kakeje, komam iiloros,