Read Ateso Isaia 41 Bible Online

Isaia 41 - Ateso bible

Isaia 41

¹Kililiŋata kakonyeneka, yes apujan; Kiteteut ituŋa akecegogoŋ: Kikunyutu kesi; kosodete einer: Kekunyakisi nepepe otube.

² Iŋai kitonyounit etuŋanan loebuni kokide, Loenyarauni ŋes kadolit abunore akejeke? Ijaikini atekerin kakonyeneke, Einakini ŋes ayait ikabakan; Ijaikini kes okilenike kwape apua, Kwape ariaŋ naekutaritai mama ejai akabwake.

³Erukitori kes, kotubor kainapakin; Korot lomam lem itorito akejeke.

⁴ Iŋai bo kesubi, kiswama da, Lokenyarau aturio ameun kageunet? Eoŋ EJAKAIT, losodit, Ido nepepe ka lokawasia, eoŋ Ŋopeŋol.

⁵Apotu apujana koanyut, kokuriakaros; Komaranata isaŋeta luka akwap: Kikunyutu, kopotu.

⁶Kiŋaranakinos ŋinituŋanan kikeidunyet; Kobala ŋinituŋanan onaceke ebe, “Kotitiŋior.”

⁷Ekekeon isidiki ekatatan esabu, Loipadipadi kenyodo isidiki loedai kamoru, Ebala nuka airuc ebe, “Ejokuna”: Kimorianak kaseito, tetere mam ilokulokun.

⁸ Konye jo, Isirael, ekakejaanakinan, Yakob loaseunit, Aur naka Aburaam opaperoka;

⁹Ijo lokekamuni kosaŋeta luka akwap, Lokanyarauni kagoriake, Katema jo ebe, “Ijoŋ ekakejaanakinan, Kaseunit jo, mama kacakari cut.”

¹⁰ Sirikikurianar, naarai ajai eoŋ nepepe kajo; Sirikibur, naarai arai eoŋ Ekonideke: Ketogogoŋi jo; eebo, keŋarakini jo; Eebo, kegani jo kakan nakoteten naka adoliteka.

¹¹ Koany, ŋul kere lukinyunyurikis jo, ileicikinete, itiriraete; Luiutas kajo eraunos mere ibore, eoliorete da.

¹²Imoi ijo luinolopatar, mam idumuni kes: Ŋul lukisurokinete jo eraunos mere ibore, kwape ibore yenitai.

¹³Naarai eoŋ EJAKAIT Ekonideke egagauni akonikan nakoteten, Kabala jo ebe, “Sirikikurianar; keŋarakini jo.”

¹⁴ Sirikikurianar, ijo ekurut Yakob, yes ituŋa luka Isirael; Ebala EJAKAIT ebe, Keŋarakini jo, Ido ekalakunanikon ŋes Lokalaunan loka Isirael.

¹⁵ Koany, ketuluori jo ibore yenikicomis yenikitetet, Yeneitara yenejaas ikel: Icomi ijo iroŋan, iriecirieci kes, Itusubi iukon kwape agugu.

¹⁶ Ipiesi kes, ekutari kes ekwam, Isiarisiari kes etapipirio, Ilelakini EJAKAIT, itopoloori Lokalaunan loka Isirael.

¹⁷Emootos lukican ka luilwaritos akipi, ido emameete, Eokete akeceŋajepa kanuka akure; Eoŋ EJAKAIT aboŋokini kes, Eoŋ Edeke loka Isirael mam ajalakini kes.

¹⁸ Aŋaikini icorin kuju neelapat, Ka akonye nuka icowa kokidiŋ kaditon: Etarauni ais atapar naka akipi, Akwap naalarion ikico luka akipi.

¹⁹Eraikini eres,* ka ekasia,* ka ekadas,* ka eseitun * loka ais toma ais; Ebwaikini eberos, * etidar, * ka eteasur [3] kere nepepe amodiŋ:

²⁰ Tetere eanyunete, ejenete, eomoomoete, Kojenutu nepepe ebe akan naka EJAKAIT ŋes eswamat ŋun, Lokalaunan loka Isirael ŋes asubi.

²¹Ebala EJAKAIT ebe, “Koyaut akusikirot.” Ebala Ekabaka loka Yakob ebe, “Kitolomut nuitogogoŋito.”

²²Kitolomut kes, kolimokis sio nuelosete ajaun: Kolimokis nusodit, kwape ejaatar, kaomoomata, kajenutu awasiakec; Arai bo kitodikis sio akiro nuepote.

²³ Kolimokis sio akiro nuepote moolo, Kajenutu ebe iraas yesi idekesio: Eebo, kiswamata nuejok, arai kiswamata nueroko, Kobur, kanolianakinos.

²⁴Koany, iraas yesi atai, akusiswam da atai: Loketale ŋol lokiseuni yes.

²⁵ Etonyounit etuŋanan loebuni kagolitomei, adolu; Etuŋanan loiwonei ekakiror loebuni kaneelomunia akoloŋ: Ebunokini ŋesi ikayaitok kwape elupot, Kwape ipudapudaa ekajean elupe.

²⁶Iŋai bo kilimokinit ameun kageunet, tetere kijenuni? Ido ameun apeŋo, tetere kinera ebe, “Edolit ŋesi”? Eebo, emamei yenelimokinit, eebo, emamei yenitodikinit, Eebo, emamei yeniirarit akusikiro.

²⁷Eoŋ ageuni alimokin Sion ebe, “Koany, koany kes”: Ido ainakini Yerusalem yeneyauni akiro nukajokak.

²⁸ Arai kasesen, emamei idiotuŋanan; Emamei kotomakec ekapetan akiro loepedori aboŋokin akirot, Arai keŋit ŋes.

²⁹Koany, kes kere, eraas aswamisiokec atai, mere ibore; Eraas akeceputosia nuecalara ekwam ka aamameak.