Read Ateso Isaia 49 Bible Online

Isaia 49 - Ateso bible

Isaia 49

¹ Kopupunoi, yes apujana; Kiirasi da yes ituŋa luilwaka: Abu EJAKAIT kanyarau kakoik; Kolimo ekakiror kaliliget naka totoka.

² Etusub akaituk bala ekileŋ loekwana, Kebwa kotoribe loka akanike; Ketarau ekojo loiputut, Ocoeke da ŋes karicitor:

³ Katema eoŋ atiar, “Ijo ekakejaanakinan; Isirael, ŋes ketubusikinere.”

⁴ Konye katema atiar, “Abu ketaaritoi taai, Atwania akagogoŋ aloŋ, atwania taai: Konye abeit ejai akatubokinio neejai EJAKAIT, Ekaropit da ejaas ka Ekadeke.”

⁵Natikwana inera EJAKAIT lokasubi eoŋ kotoma akoik Araun ekekejaanakinan, Ainyakakin ŋes bobo Yakob, Ido kotukonokinai Isirael neejai: (Naarai ebusu eoŋ kakonye nuka EJAKAIT, Ekadeke da arau akagogoŋ.)

⁶ Eebo, ebala ebe, “Erai akirot naebenen noi jo araun ekakejaanakinan Aitonyoun atekerin nuka Yakob, Ka aitajar luapiaŋunos kotoma Isirael: Kainakin jo da araun aica mama ejaas lukacekwapin, Koraenena akaitajar aitodol awasia naka akwap.”

⁷Inera kwanata EJAKAIT, Ekalakunan loka Isirael, ido Ekalaunanike, Mama ejai ŋol loemenito ituŋa, ŋol loelait ateker, Ekejaanakinan loka ikayaitok, ebe: “Eanyunete ikabakan, enyounete; Lukapolok da, emaete; Kanuka EJAKAIT loerai emunot, Ekalaunan loka Isirael, loabu koseu jo.”

⁸ Inera kwanata EJAKAIT ebe, “Kaboŋok jo kapak nakaeamunia, Ido keŋarak kapaaran naka aitajario: Ido kekuniai jo, Kainak araun aitutuket mama ejaas ituŋa, Aiticat akwap, aisurum airumeta nukamejei;

⁹ Kolimonokini ŋul lueenitai ebe, ‘Kolomasi,’ Ka ŋul luejaas kamuton ebe, ‘Kitoduunos.’ Enyamenenete korotin, Komor kere luelapat nen eraun eronyikec.

¹⁰ Mam kes eriebenenei eteŋei, karaida akure; Kwabo mam enomonori akoloŋ karaida aibuse: Naarai ŋol loitimi inarenenokini kes, Eyanaanari da atanin.

¹¹Ido etuluori ikaronan kere araun erot, Iturio da ikarotin.

¹²Koany, epote lu kama elwana; Ido, koany, epote lu kagolitomei koto da; Ido epote lu kakwap naka Sinim.

¹³Koye, ijo akuj; kolakar, ijo akwap; Kogeut ayoore, yes iroŋan: Naarai etalaka EJAKAIT ikennja, Ido itimi luke lukiticanio.”

¹⁴Konye kobala Sion ebe, “Kajalak YAWE, Kemurwoki EJAKAIT.”

¹⁵ “Epedori aberu ikekoku yenenaki aimurwokin, Komam isionie okoku loka akoikike?” Eebo, epedorete ŋun aimurwokin, Konye mam eoŋ kemurwokini jo.

¹⁶ Koany, kegiranakinit jo otauon luka akaninika; Ejaenenas arwatatinikon kakonyeneka tiritir.

¹⁷Isunyito ikadukokokon adepar ikamudiarakakon, Elomarete da ŋul lukitisilete kamakon.

¹⁸ Kiteluo akonikonye, ido koany: Etukonokinos ŋul kere, epote mamakon. Ebala EJAKAIT ebe, “Kwape ajaria, Abeit inapi kes kere kwape lukisiro, Iyogogoi kwape ateran.

¹⁹ Naarai aiboisiokon nuiswapito nuesilok, Ka akwapukon naemudiara, Abeit kwape kwana ididinik luiboiete kotomakon, Ŋul da lukilikorete elwakaros.

²⁰ Etemarete idwe luaurio kapak naka atwaniarikon akiikon ebe, ‘Kadidiniki eoŋ aibois: Konyaikinai keboikin.’

²¹ Kosodi ijo atemar kotaukon atiar, ‘Iŋai bo kaurikini ŋul, Naarai atwania idweka, do acuduŋun bon, Arai nakerenearitai, nairimi lailo ka laije? Iŋai esai ŋul? Koany, asal bon; ai bo kejaas ŋul?’ ”

²²Ebala EJAKAIT Edeke kwanata ebe, “Koany, ekeari akakan mama ejaas atekerin, Asipokini aanyuneteka mama ejaas ituŋa: Eyaunete odwekon katorobusiokec, Erionakinete adwekon okepirinikec.

²³ Eraunos ikabakan lukapapakon lukisaete, Akabakanakec da nukatotokon nukisaete: Ekukonokinos jo kitulurito akecekonyen kwap, Emeete adae nukakejekon; Ŋeŋuni da ebe arai eoŋ EJAKAIT, Ŋul da lukedareunete mam irumete ileic.”

²⁴ Edemario tope lumejan kama ka ikagogoŋok? Arai bo eyuunio lukikamuna luka ekadoliton?

²⁵Konye ebala EJAKAIT kwanata ebe, “Edemario cabo lukikamuna luka ikagogoŋok, Eyuunio da lumejan luka lusogim: Naarai kinolopikin eoŋ kaŋol loinolopas kajo, Etajari ikonidwe.

²⁶ Etanyami eoŋ ŋul lukimwanito jo akiriŋikec kikulepek; Emerikinos akeceokot kikulepek, kwape kebino loewiny. Kosodete ejenunete awat kere ebe, Eoŋ EJAKAIT arai eketajaranikon, Ekalakunanikon, Ekagogoŋon loka Yakob.”