Read Ateso Isaia 50 Bible Online

Isaia 50 - Ateso bible

Isaia 50

¹ Ebala EJAKAIT kwanata ebe, “Ali bo ebalua loka aireŋear totokus, Lokerenearia ŋes? Arai bo iŋai bo kaŋul lukeburaete loabu ketwegel yes? Koany, kigwelaritai kanuka numam adolitekus, Ireŋearitai totokus kanuka adiakanaretakus.

² Kanukinyo kemamear ituŋanan naabunitor eoŋ? Nakanyaritor, kemamear yeneboŋokini? Aurianar cabo akakan, tetere mam epedori alakun? Emamei kereka eoŋ apedor ayuun? Koany, arai ketoron, etooni aŋolol, Etusubi icorin kwape amodiŋ: Ebosuunete iborokec lukecor, naarai emameete akip, Etwakete akure.

³Etanapi eoŋ akuj amonut, Emukori ŋes kepuko.”

⁴ Kainak EJAKAIT Edeke eoŋ aŋajep naka ŋul kaluisisianakinitai, Tetere ajeni aigaŋ kakiro ŋin yenepasit: Itikwenyuni ŋinitupuruc, Itikwenyuni akakit akiiranar kwape ŋul luisisianakinitai.

⁵ Apuko EJAKAIT Edeke akakit, Ido mam eoŋ epali ono, Karaida aboŋor kau.

⁶ Abu kainak epuraka ikasenesenok, Iitinyoka da mama kaŋul lukenyulanarete ajul: Mam abu karap akakonyen koleic Ka aimwanakinio da aimul.

⁷ Naarai keŋarakini EJAKAIT Edeke, Ŋes mam etiriraa; Ŋes keticasia akakonyen bala eikep, Ido ajeni ebe mam kerumete ileic.

⁸ Eapie ŋesi loketojoki eoŋ; Iŋai ca ketonolopi? Kabwaata bo nepepe. Iŋai ca lokekoloka? Kikuny mama ajai.

⁹ Koany, EJAKAIT Edeke keŋarakini; Iŋai ca ŋin yenikesitelekari? Koany, emoionete rwaru kesi kere kwape anapito; Idonyorete ikajekel kes pit.

¹⁰ Iŋai ca kokidiŋikus yeneyoŋit EJAKAIT, Yenerimarit eporoto loka ekebulesit? Ŋin yenelosenenei kamuton, komam aica, Komun do ŋesi ekiror loka EJAKAIT, Kieatunitor Ekedeke.

¹¹ Koanyutu, yes kere luisinepete akim, Iyenanakinos bonik akalasia; Kolosenenete kotoma aica naka akimikus, Ido toma akalasia nuisinepata. Idumunete na kakanika, Iperete kotoma aiturur.